హుజూరాబాద్, వెలుగు: కరీంనగర్ జిల్లా హుజూరాబాద్ పట్టణంలోని అంబేద్కర్ చౌరస్తాలో సోమవారం రాత్రి భారీ అగ్నిప్రమాదం జరిగింది. ఈ ప్రమాదంలో 20కి పైగా పండ్ల దుకాణాలు కాలిపోయాయి. చౌరస్తాలోని 20కి పైగా పండ్ల దుకాణాలు, పూల బండ్లు ఏర్పాటు చేసుకొని వ్యాపారం చేసుకుంటున్నారు. అర్ధరాత్రి పండ్ల దుకాణాల నుంచి మంటలు ఎగిసి పడడంతో స్థానికులు పోలీస్, ఫైర్ సిబ్బందికి సమాచారం అందించారు. ఫైర్ సిబ్బంది అక్కడికి చేరుకొని మంటలను ఆర్పివేశారు. అప్పటికే దుకాణాలు పూర్తిగా దగ్ధమయ్యాయి.
ఏసీపీ శ్రీనివాస్ ఘటనా స్థలానికి చేరుకొని వివరాలు అడిగి తెలుసుకున్నారు. ఎమ్మెల్యే పాడి కౌశిక్ రెడ్డి, కాంగ్రెస్ పార్టీ ఇన్చార్జి వొడితల ప్రణవ్, బీజేపీ జిల్లా అద్యక్షుడు గంగాడి కృష్ణారెడ్డి మంగళవారం బాధితులను పరామర్శించి అండగా ఉంటామని భరోసా ఇచ్చారు. ఓ పక్క వాన కురుస్తున్న సమయంలో ఒక్కసారిగా మంటలు ఎగిసిపడడం పట్ల అనుమానాలు వ్యక్తం అవుతున్నాయి. విద్యుత్ షార్ట్ సర్క్యూట్తో ప్రమాదం జరిగిందా? ఎవరైనా నిప్పంటించారా? అనే కోణంలో పోలీసులు దర్యాప్తు చేస్తున్నారు
