- 90 స్కూళ్లలో ఇన్చార్జి ప్రిన్సిపాల్స్, హెచ్బీటీలతో బోధన
- పదకొండేండ్లుగా ట్రాన్స్ఫర్లు, ప్రమోషన్లు లేక టీచర్ల అవస్థలు
- డిమాండ్ల సాధన కోసం నేటి నుంచి ఆందోళనబాట
మంచిర్యాల, వెలుగు: అవి పేరుకే మోడల్ (ఆదర్శ) స్కూళ్లు కానీ అన్నీ సమస్యలే. సరిపడా టీచర్లు లేరు. ఉన్నవారికి 11 ఏండ్లుగా ట్రాన్స్ఫర్లు, ప్రమోషన్లు లేవు. ఖాళీ పోస్టుల రిక్రూట్మెంట్ లేదు. 90కి పైగా స్కూళ్లలో ఇన్చార్జి ప్రిన్సిపాల్సే ఉన్నారు. 50కి పైగా స్కూళ్లలో హవర్లీ బేస్డ్ టీచర్స్(హెచ్బీటీలు)తో విద్యాబోధన సాగిస్తున్నారు. జూనియర్ లెక్చరర్ల నియామకం చేపట్టకపోవడంతో పీజీటీలతోనే ఇంటర్ పిల్లలకు చదువు చెప్పిస్తున్నారు. హాస్టళ్ల మెయింటనెన్స్ను కస్తూర్బా (కేజీబీవీ) స్పెషల్ ఆఫీసర్లకు అప్పగించారు.
ఇలా అనేక సమస్యలతో సతమతమవుతున్న మోడల్స్కూళ్లను గత బీఆర్ఎస్ సర్కారు పట్టించుకోలేదు. రాష్ర్టంలో అధికారంలోకి వచ్చిన కాంగ్రెస్ ప్రభుత్వమైనా మోడల్స్కూళ్లను గాడిలో పెట్టాలని టీచర్లు కోరుతున్నారు. తమ డిమాండ్ల సాధన కోసం సోమవారం నుంచి ఆందోళనకు దిగనున్నారు. సర్కారు స్పందించకపోతే ఈ నెల 29న డైరెక్టరేట్ ఆఫ్ స్కూల్ ఎడ్యుకేషన్ ఆఫీస్ ముట్టడించాలని నిర్ణయించుకున్నారు.
గాలికి వదిలేసిన బీఆర్ఎస్ సర్కారు
తెలంగాణ వ్యాప్తంగా 194 మోడల్ స్కూళ్లు ఉన్నాయి. వీటిలో సుమారు 3,800 టీచర్ పోస్టులకు ఉమ్మడి రాష్ర్టంలో 2013 జూన్లో అప్పటి కాంగ్రెస్ ప్రభుత్వం 2,800 పోస్టులను రిక్రూట్చేసింది. ఇందులో ట్రెయిన్డ్ గ్రాడ్యుయేట్టీచర్స్ (టీజీటీ), పోస్ట్ గ్రాడ్యుయేట్ టీచర్స్ (పీజీటీ)లను భర్తీ చేసింది. 2014 నుంచి 2023 వరకు పదేండ్లు అధికారంలో ఉన్న బీఆర్ఎస్ మోడల్ స్కూళ్లను గాలికి వదిలేసింది. వెయ్యికి పైగా ఖాళీ పోస్టుల్లో హవర్లీ బేస్డ్ టీచర్స్(హెచ్బీటీ)ను నియమించింది. అప్పటినుంచి ఇప్పటివరకు మోడల్ స్కూళ్లలో టీచర్ల రిక్రూట్మెంటే జరగ లేదు. ఇటీవల కాంగ్రెస్ ప్రభుత్వం మెగా డీఎస్సీ నోటిఫికేషన్ జారీ చేసిన సంగతి తెలిసిందే. ఇందులో మోడల్ స్కూల్ టీచర్ల రిక్రూట్మెంట్ లేకపోవడంతో మళ్లీ హెచ్బీటీలపైనే ఆధారపడాల్సిన పరిస్థితి నెలకొంది.
2013 నుంచీ ఒకే చోట...
11 ఏండ్లుగా ట్రాన్స్ఫర్లు, ప్రమోషన్లు లేకపోవడంతో మోడల్ స్కూల్ టీచర్లు తిప్పలు పడుతున్నారు. 2013లో అపాయింట్మెంట్అయిన చోటనే నేటికీ పనిచేస్తున్నారు. 2016లో జిల్లాలు బైఫర్కేషన్ కావడంతో పిల్లల చదువులు, స్థానికత విషయంలో కొత్త సమస్యలు వచ్చాయి. ఉదాహరణకు...నిర్మల్ జిల్లాకు చెందిన ఓ వ్యక్తి మంచిర్యాల జిల్లా పరిధిలోని ఓ స్కూల్లో పనిచేస్తున్నారు. ఆయన పిల్లలు ఒకటి నుంచి ఏడో తరగతి వరకు వరుసగా నాలుగు క్లాస్లు ఏ జిల్లాలో చదివితే ఆ జిల్లానే వారికి లోకల్ అవుతుంది. మరోవైపు నిర్మల్ జిల్లా బాసర జోన్లోకి వెళ్లగా, మంచిర్యాల జిల్లా కాళేశ్వరం జోన్ పరిధిలో ఉంది. ఇలా సొంత జిల్లా ఒక జోన్, లోకల్ జిల్లా మరో జోన్ అవుతుంది. దీంతో భవిష్యత్తులో ఉద్యోగాల విషయంలో సమస్యలు వస్తాయంటున్నారు. ఈ క్రమంలో ట్రాన్స్ఫర్లు చేపట్టాలని కోరుతున్నారు. అలాగే ఖాళీగా ఉన్న ప్రిన్సిపాల్, జేఎల్ పోస్టులను ప్రమోషన్ల ద్వారా భర్తీ చేయాలని కోరుతున్నారు.
డిమాండ్లు ఇవే..
వెంటనే ట్రాన్స్ఫర్లు, ప్రమోషన్లు చేపట్టాలని, 010 మద్దు ద్వారా జీతాలు చెల్లించాలని టీచర్లు డిమాండ్చేస్తున్నారు. అలాగే హెల్త్ కార్డులు జారీ చేయాలని, ఉద్యోగ భద్రత కల్పించడంతో పాటు కారుణ్య నియామకాలు చేపట్టాలని, హిందీ పీజీటీ పోస్టులను ఏర్పాటు చేయాలని, పీజీటీలకు జూనియర్ లెక్చరర్లుగా ప్రమోషన్లు ఇవ్వాలంటున్నారు. ప్రిన్సిపాల్, పీజీటీ, టీజీటీ ఖాళీలను భర్తీ చేయాల్సిందేనంటున్నారు.
ఆందోళన కార్యక్రమాల్లో భాగంగా ఈ నెల 24న నల్లబ్యాడ్జీలు ధరించి డ్యూటీలకు హాజరుకావాలని నిర్ణయించుకున్నారు. 25, 26 తేదీల్లో మధ్యాహ్నభోజనం విరామ సమయంలో నిరసనలు చేపట్టడం, సీఎంవో, విద్యాశాఖ కార్యదర్శికి సోషల్ మీడియా ప్లాట్ఫాం ఎక్స్లో పోస్టులు చేయడం. 27న తహసీల్దార్, ఎంఈవోలకు మెమోరాండం ఇవ్వడం, 28న కలెక్టర్, డీఈవో ఆ ఫీసుల ఎదుట, 29న డైరెక్టరేట్ ఆఫ్ స్కూల్ ఎడ్యుకేషన్ ఆఫీస్ ఎదుట ధర్నా చేయాలని నిశ్చయించుకున్నారు.
ఇన్చార్జీలతోనే నెట్టుకొస్తున్నరు...
రాష్ర్టవ్యాప్తంగా దాదాపు 90 మోడల్ స్కూళ్లలో రెగ్యులర్ ప్రిన్సిపాల్స్ లేరు. దీంతో టీజీటీ, పీజీటీలకు ఇన్చార్జి బాధ్యతలు అప్పగించి నడిపిస్తున్నారు. 50 స్కూళ్లలో రెగ్యులర్ టీచర్లు లేకపోవడంతో హెచ్బీటీలతో నెట్టుకొస్తున్నారు. మంచిర్యాల జిల్లాలోని మంచిర్యాల, కోటపల్లి, కాసిపేటలో
ఇదే పరిస్థితి నెలకొంది. మందమర్రి, దండేపల్లి మండలం లింగాపూర్ స్కూళ్లలో మాత్రమే టీజీటీ, పీజీటీలున్నారు. మోడల్ స్కూళ్లలో ఇంటర్మీడియట్ బోధించడానికి జూనియర్ లెక్చరర్లను రిక్రూట్చేయలేదు.
9,10 క్లాస్లకు టీచింగ్ చేసే పీజీటీలతోనే ఇంటర్ క్లాస్లు చెప్పిస్తున్నారు. దీంతో ఇంటర్లో ఆశించిన ఫలితాలు రావడం లేదంటున్నారు. అలాగే ఇంటర్ గర్ల్స్కోసం మోడల్ స్కూళ్లలో హాస్టల్స్ ఏర్పాటు చేశారు. ఏండ్లు గడుస్తున్నా కొన్ని చోట్ల హాస్టళ్లను ప్రారంభించకపోవడం వల్ల బాలికలు డే స్కాలర్స్గా చదువుకుంటున్నారు.ఊళ్లకు దూరంగా ఉన్న స్కూళ్లకు వచ్చిపోవడానికి సరైన రవాణా సౌకర్యాలు అవస్థలు పడుతున్నారు. హాస్టళ్ల మెయింటనెన్స్ను కేజీబీవీ స్పెషల్ ఆఫీసర్లకు అప్పగించడం వల్ల పర్యవేక్షణ కొరవడింది.
