భద్రాచలం, వెలుగు : గోదావరి నడిమధ్యలో ద్వీపంలా ఉండే 2 ఎకరాల ప్రాంతంలో కొలువై ఉన్న మోతెగడ్డ వీరభద్రస్వామి ఆలయం ప్రమాదపుటంచున ఉంది. ఇటీవల వచ్చిన భారీ వరదలకు గుడి చుట్టూ భాగం మొత్తం కోతకు గురైంది. బూర్గంపాడు మండలం ఇరవెండి పరిధిలోని మోతె గ్రామం నుంచి పడవల్లో ఈ ఆలయానికి నిత్యం భక్తులు దర్శనానికి వెళ్తుంటారు. శివరాత్రి సమయంలో ఏడు రోజుల పాటు ఉత్సవాలు జరుగుతాయి.
కాకతీయుల కాలం నాటి ఈ ఆలయంపై భద్రాచలం మన్యంలో పలువురు భక్తులకు నమ్మిక. ఎండోమెంట్ పరిధిలో ఈ ఆలయం ఇప్పుడు ప్రమాదంలో చిక్కుకుంది. ఎల్ షేప్లో భూమి మొత్తం వరదలతో కోతకు గురైంది. వెంటనే రిపేర్లు చేపట్టాలని భక్తులు కోరుతున్నారు. కాగా ఇటీవల పినపాక ఎమ్మెల్యే పాయం వెంకటేశ్వర్లు ఎండోమెంట్ఆఫీసర్లతో మోతెగడ్డను సందర్శించారు. ఎండోమెంట్ డీసీ, ఏసీ, డీఈలను తీసుకుని ఆయన వీరభద్రస్వామి ఆలయంలో అవసరమైన పనుల కోసం ఎస్టిమేషన్లు తయారు చేయాలని ఆదేశించారు. ఇంజినీర్లు ఇచ్చే నివేదిక ప్రకారం ఎస్టిమేషన్లను డీసీ ద్వారా కమిషనర్కు పంపుతామని, వారి ఆమోదం వచ్చాక రిపేర్ల పనులు ప్రారంభిస్తామని ఖమ్మం జిల్లా ఎండోమెంట్ అసిస్టెంట్ కమిషనర్ వీరస్వామి
తెలిపారు.
