- మందు తాగి జల్సాలు తిడుతూ..కొడుతుండడడంతో హత్యకు ప్లాన్
- తాగించి మెడకు టవల్బిగించి మర్డర్
- ప్రధాన నిందితురాలితో పాటు సహకరించిన వారి అరెస్ట్
కామారెడ్డి, వెలుగు : కామారెడ్డి జిల్లాలో జల్పాలకు అలవాటు పడి మద్యానికి బానిసై ఇబ్బందులు పెడుతున్న కొడుకును హత్య చేయించిందో తల్లి. ఈ ఘటనలో తల్లితో పాటు మరో ముగ్గురిని సదాశివనగర్ పోలీసులు అరెస్టు చేశారు. పోలీసుల కథనం ప్రకారం..సదాశివనగర్ మండలం అడ్లూర్ఎల్లారెడ్డి పెద్ద చెరువు సమీపంలో గత నెల 25న గుర్తు తెలియని వ్యక్తి శవం పూర్తిగా కుళ్లిపోయిన స్థితిలో కనిపించింది. ట్రైనీ ఐపీఎస్, సదాశివనగర్ఎస్హెచ్వో ఎం.ఎస్.కాజల్ ఆధ్వర్యంలో ఎంక్వైరీ చేయగా హత్య వివరాలు వెలుగులోకి వచ్చాయి. మృతుడిని లింగంపేట మండలం పొల్కంపేటకు చెందిన కదాల సాయిలు (48)గా గుర్తించారు. మృతుని తల్లి లచ్చవ్వ ఈ హత్య చేసినట్టుగా తేల్చారు. ఆమె విచారణలో పలు విషయాలు బయటపెట్టింది. సాయిలు ఆరేడు పెండ్లిళ్లు చేసుకుని అందరినీ వదిలేశాడు.
మద్యానికి అలవాటు పడి జల్సాలు చేసేవాడు. భూమి అమ్మగా వచ్చిన డబ్బులతో మద్యం తాగి వచ్చి తల్లిని కొట్టేవాడు. ఈ బాధల్ని భరించలేని లచ్చవ్వ నిజామాబాద్ జిల్లా కమ్మర్పల్లిలోని నాగాపూర్కు చెందిన బసవకొండ దేవ్కు ఫోన్చేసి తన కొడుకును చంపాలని కోరింది. వరుసకు మనవడయ్యే దేవ్దీనికి ఒప్పుకుని ఈ నెల 24న కరీంనగర్ జిల్లాలోని బండ లింగాపూర్కు చెందిన మారుతి అలియాస్ చందుతో కలిసి గ్రామానికి వచ్చాడు. సాయిలును అడ్లూర్ఎల్లారెడ్డి శివారులోని చెరువు వద్దకు తీసుకువెళ్లారు. ఎక్కువగా మద్యం తాగించి స్పృహ కోల్పోయిన తర్వాత మెడకు టవల్బిగించి చంపి పారిపోయారు. కేసు ఎంక్వైరీలో సదాశివనగర్ సీఐ సంతోష్కుమార్, ఎస్సై రాజు, సిబ్బంది చురుకుగా వ్యవహరించారని ఎఎస్పీ కాజల్ తెలిపారు.
