కరీంనగర్ : కరీంనగర్ జిల్లా కేంద్రంలో ట్రాఫిక్ నియంత్రణ పక్కనపెట్టి.. కేవలం ఫొటోలు తీస్తున్న ఓ ట్రాఫిక్ కానిస్టేబుల్ను వాహనదారులు నిలదీశారు. ఇవాళ ఉదయం కరీంనగర్ కోర్టు రోడ్డులో విద్యుత్ భవన్ సమీపంలో ఓ ట్రాఫిక్ కానిస్టేబుల్ హెల్మెట్ లేకుండా టూవీలర్స్ నడుపుతున్న వాహనదారులను ఫొటోలు తీస్తున్నాడు. కొద్దీ దూరంలోని పాత రిజిస్ట్రేషన్ ఆఫీస్ దగ్గర ఉన్న జంక్షన్ వద్ద భారీగా ట్రాఫిక్ జామ్ అయ్యింది. వాహనాలను నియంత్రించేందుకు ట్రాఫిక్ పోలీసులు లేకపోవడంతో వాహనదారులు తీవ్ర ఇబ్బందులు పడ్డారు.
ఆగ్రహంతో కొందరు వాహనదారులు ఫొటోల్లో నిమగ్నమైన ట్రాఫిక్ కానిస్టేబుల్ ను అక్కడే నిలదీశారు. "ఓ వైపు ట్రాఫిక్ జామ్ అవుతుంటే.. ఇక్కడ ఫొటోలు తీసుకుంటావా?" అంటూ గట్టిగా అడగడంతో సదరు కానిస్టేబుల్ అక్కడి నుంచి వెళ్లిపోయాడు. ప్రతిరోజూ ట్రాఫిక్ కానిస్టేబుల్ నిల్చునే ప్రాంతానికి కొద్ది దూరంలో వాహనాలు జామ్ అవుతుంటాయని, కాలేజీకి వెళ్లే సమయంలో విద్యార్థులు, పేరెంట్స్ తీవ్ర అవస్థలు పడుతుంటారని చెబుతున్నారు.
