ఏటా ఆస్కార్ నామినేషన్ సీజన్ మొదలవగానే మనల్ని మనమే కించపరచుకునేలా కామెంట్లు వినిపిస్తాయి. ఇంత పెద్ద దేశంలో ఆస్కార్ అవార్డు కొట్టగల రేంజ్ సినిమా ఒక్కటీ లేదనేస్తారు. ఇది నిజమా?!. దేశంలో ప్రతి ఏడాది 26 భాషల్లో 1,600 వరకు సినిమాలు రిలీజవుతున్నాయి. సోషల్ కాజ్కి కమర్షియల్ ఎలిమెంట్స్ జోడించి తీసే ఇండియన్ సినిమాలు బాక్సాఫీసు దగ్గర కోట్లు వసూళ్లు చేస్తున్నాయి. టెక్నికల్గా మన సినిమా హాలీవుడ్ స్థాయిని అందుకుంటోంది. మన దగ్గరున్నన్ని కథలు, పాత్రలు ప్రపంచంలో మరే దేశంలోని సినిమా ఇండస్ట్రీలోనూ లేవని ఢంకా బజాయించి చెప్పొచ్చు.
‘ఆడియన్స్ ఆదరించిందే అత్యుత్తమ చిత్రం’ అన్నారు ఎన్.టి.రామారావు. ఆయన దాదాపు 400 సినిమాల్లో నటించినా కేవలం రెండు, మూడు సినిమాలకే ‘ఉత్తమ ప్రాంతీయ చిత్రం’ అవార్డులు వచ్చాయి. అసలు జాతీయ స్థాయిలోనే తెలుగు సినిమాకి ఉత్తమ ఫీచర్ ఫిల్మ్ అవార్డు ఒకే ఒక్కసారి (2015లో ‘బాహుబలి’కి) వచ్చింది. అలాగని తెలుగు సినిమా స్టామినాని తక్కువచేసి చూడలేం. ఏటా ఆస్కార్ అవార్డుల నామినేషన్ సీజన్ మొదలవగానే మనల్ని మనమే కించపరచుకునేలా కామెంట్లు వినిపిస్తుంటాయి. ఇంత పెద్ద దేశంలో ఆస్కార్ అవార్డు కొట్టగల రేంజ్ సినిమా మనకొక్కటీ లేదనేస్తారు.
ఎన్టీఆర్ అన్నట్లుగా మనది పాపులర్ సినిమా. మన సినిమాకి మార్కెట్ పరిధి ఉంది. ఇప్పుడిప్పుడే ఓవర్సీస్ మార్కెట్లోకి ఎంట్రీ ఇచ్చి, మన ముద్ర చాటుకుంటున్నాం. ఈ రోజు దేశమంతా టాలీవుడ్ వైపు చూసే రేంజ్కి ఎదిగాం. తమిళ సినిమా కోలీవుడ్, మలయాళ పరిశ్రమ మల్లువుడ్, కన్నడ ఇండస్ట్రీ శాండల్వుడ్ వగైరా పేర్లతో ఎంటర్టైన్మెంట్ రంగంలో రాణిస్తున్నాయి. ఈ మధ్యనే రాజస్థానీ సినీ పరిశ్రమ రాలీవుడ్గా ప్రవేశించి ఏడాదికి పదీ, పదిహేను సినిమాలు తీయగలుగుతోంది.
దేశంలో కాశ్మీర్ మొదలుకొని కన్యాకుమారి వరకు ఏటా 26 భాషల్లో 1,600కి పైగా సినిమాలు తీస్తుంటారు. తెలుగు, హిందీ, తమిళం వంటి కొన్ని ప్రధాన భాషల్లో 200 పైచిలుకు సినిమాలు వస్తుంటే; ఒడియా, భోజ్పురి లాంటి భాషల్లో 100 లోపు సినిమాలు రిలీజవుతుంటాయి. అన్ని భాషల్లోనూ పాపులర్ సినిమాలు తీయటం ఇండియా ప్రత్యేకత. ప్రపంచవ్యాప్తంగా మార్కెట్ ఉన్న హాలీవుడ్తో పోటీ పడే స్థాయిలో ఇండియన్ సినిమా ఎదిగింది. టెక్నాలజీపరంగా మనకున్న ఆర్థిక, సాంకేతిక వనరుల్లో బెస్ట్ ప్రొడక్ట్ ఇవ్వగలుగుతున్నాం. హాలీవుడ్ తర్వాత ప్రపంచవ్యాప్తంగా వెయ్యి స్క్రీన్లలో ఒకేసారి విడుదల చేయగల సత్తా ఉన్న సినిమా ఇండస్ట్రీ ఇండియాలోనే ఉంది.
అసలు ఆస్కార్ అవార్డులు ప్రపంచ సినిమాకి ఇవ్వరనే విషయం చాలా మందికి తెలియదు. అది హాలీవుడ్లో లేదా అమెరికన్ దర్శక, నిర్మాతలు బయట తీసే ఇంగ్లిష్ పిక్చర్లకు ఇస్తారు. బ్రిటిష్వాళ్లు తమ కోసం ‘బ్రిటిష్ అకాడమీ’ని పెట్టుకొని సినిమా, టీవీ రంగాల్లో ఉత్తమమైనవాటికి అవార్డులు ఇచ్చుకుంటారు. బ్రిటిష్ అకాడమీ ఆఫ్ ఫిల్మ్ అండ్ టెలివిజన్ ఆర్ట్స్ (బాఫ్టా) ఇచ్చే అవార్డులు కాబట్టి వాటిని ‘బాఫ్టా’ అవార్డులంటారు. 1998లో హాలీవుడ్వాళ్లు తాము తీసుకున్న ‘షేక్స్పియర్ ఇన్ లవ్’ సినిమాకి ఇచ్చుకోగా బాఫ్టావాళ్లు తమ దగ్గర తీసిన ‘షేక్స్పియర్స్ రోమియో అండ్ జూలియట్’కి ఇచ్చుకున్నారు. ఇలాంటి పోటీ అప్పుడప్పుడు జరుగుతుంది.
ఇప్పటివరకు 91 సార్లు ఆస్కార్ అవార్డులు ప్రకటించారు. వచ్చే ఫిబ్రవరి 24న ఇచ్చేవి 92వ ఆస్కార్ అవార్డులు. వీటిని అమెరికాలోని చిత్ర పరిశ్రమను ప్రోత్సహించడం కోసం అక్కడి ఫిల్మ్ మేకర్లు 1927లో చేసుకున్న ఏర్పాటిది. అకాడమీ ఆఫ్ మోషన్ పిక్చర్ ఆర్ట్స్ అండ్ సైన్సెస్వారు ఏటా హాలీవుడ్లో నిర్మించిన ఇంగ్లిష్ సినిమాలకు గోల్డ్ కోటింగ్ వేసిన ప్రతిమను అవార్డుగా ఇస్తారు. వీటినే అకాడమీ అవార్డు లేదా ఆస్కార్ అవార్డుగా పిలుస్తారు. బెస్ట్ ఫిల్మ్, బెస్ట్ డైరెక్టర్, యాక్టర్, యాక్ట్రెస్, ఒరిజినల్ స్కోర్ (సంగీతం) వంటి 24 కేటగిరీల్లో ఆస్కార్ అవార్డులిస్తారు. బయటి దేశాల నుంచి వచ్చే ఇతర భాషా చిత్రాలకు కూడా అవార్డు ఇస్తారు. అలాంటివాటికి బెస్ట్ ఇంటర్నేషనల్ ఫీచర్ ఫిల్మ్ కింద ఒకటే అవార్డు ప్రకటిస్తారు. ఈ అవార్డు కోసం ప్రపంచ దేశాల నుంచి ఎంట్రీలను తీసుకుని బాగా వడపోస్తారు.
మన దేశంలో అవార్డ్ విన్నింగ్ సినిమాలకు ప్రేక్షకాదరణ అంతంతమాత్రంగా ఉంటుంది. ఆస్కార్ అవార్డులు అందుకున్న సినిమాల పరిస్థితి కూడా అంతే. బాక్సాఫీసుని కలెక్షన్లతో హోరెత్తించిన సినిమాలకు కనీసం బెస్ట్ ఫిల్మ్ నామినేషనైనా దక్కదు. కాబట్టి, మనం వరల్డ్ సినిమాలో వెనకబడ్డామనే ఆలోచన అక్కర్లేదు. తెలుగు సినిమా స్టామినా ఇప్పుడు రూ.100 కోట్ల వసూళ్లకు ఎదిగింది. టెక్నికల్గా ‘బాహుబలి’లాంటి అద్భుత చిత్రాన్ని తీయగలిగిన చరిత్ర టాలీవుడ్దే. సోషియో కాన్ఫ్లిక్ట్ ఇష్యూలతో ‘రంగస్థలం’, ‘భరత్ అను నేను’, ‘మహర్షి’, ‘అర్జున్రెడ్డి’ లాంటి భిన్న కథాంశాలతో టాలీవుడ్ రేంజ్ని పెంచగలుగుతున్నారు.
