- బీఆర్ఎస్‌పై ఎంపీ బండి సంజయ్ ఫైర్
- ప్రధానిని రేవంత్ ఐదేండ్ల పాటు పెద్దన్నలాగే చూడాలని సూచన
- గెలిచాక కేంద్ర నుంచి నిధులు తెస్తామని ప్రకటన
హుజూరాబాద్ రూరల్(శంకరపట్నం), వెలుగు : బీజేపీ, కాంగ్రెస్ తూర్పు పడమర వంటి పార్టీలని, రెండు పార్టీలు పొత్తు పెట్టుకుంటాయంటున్న బీఆర్ఎస్ నేతలు కారు కూతలు మానుకోవాలని బీజేపీ జాతీయ ప్రధాన కార్యదర్శి, ఎంపీ బండి సంజయ్ ఫైర్ అయ్యారు. బుధవారం శంకరపట్నం మండలం గద్దపాక నుంచి ప్రజాహిత యాత్రను ప్రారంభించారు. ఈ యాత్ర గద్దపాక, కాచాపూర్, మెట్పల్లి, లింగాపూర్, కొత్తగట్టు, కేశవపట్నం మానకొండూర్, అన్నారంలో కొనసాగింది. సంజయ్ మాట్లాడుతూ ప్రధానమంత్రి మోదీని సీఎం రేవంత్రెడ్డి కలవడంపై బీఆర్ఎస్ నేతలు రాజకీయం చేయడాన్ని తప్పు పట్టారు.
రేవంత్ రెడ్డి ప్రధానిని ఐదేండ్లపాటు పెద్దన్న లాగే చూడాలని, తాము గెలిచాక కేంద్రం నుంచి నిధులు తీసుకొచ్చే బాధ్యత తీసుకుంటామన్నారు. కేసీఆర్ మాదిరిగా ప్రధానిని చిల్లర మల్లర తిట్లు తిట్టి ప్రజల్లో చులకన కావద్దని హితవు పలికారు. రాష్ట్రంలోని 17 లోక్సభ సీట్లలో బీజేపీని గెలిపించాలన్నారు. మోదీ మళ్లీ ప్రధాని కాకపోతే కేంద్రం ఇచ్చే సబ్సిడీలన్ని ఆగిపోతాయన్నారు. జిల్లా ఉపాధ్యక్షుడు మాడ వెంకట్ రెడ్డి, జిల్లా నాయకులు సమ్మిరెడ్డి, మండల అధ్యక్షులు ఏనుగుల అనిల్ పాల్గొన్నారు.
