చేర్యాల, కొమురవెల్లి, వెలుగు: ఈ ప్రాంతంలోని రైతులకు సాగునీటి కష్టాలు లేకుండా చూస్తామని భువనగిరి ఎంపీ చామల కిరణ్ కుమార్ రెడ్డి అన్నారు. బుధవారం కొమురవెల్లి మండలంలోని తపాస్పల్లి రిజర్వాయర్ ను, చేర్యాల మండలంలోని అర్జునిపట్ల, కమలాయపల్లిలో కాల్వలను మద్దూరు మాజీ జడ్పీటీసీ గిరికొండల్ రెడ్డితో కలిసి సందర్శిచారు.
ఈ సందర్భంగాఎంపీ మాట్లాడుతూ.. కొన్ని రోజులుగా తపాస్పల్లి రిజర్వాయర్ లోకి నీటిని విడుదల చేయకపోవడంతో రిజర్వాయర్ లో నీటి శాతం తగ్గి, చెరువులు, కుంటలు ఎండిపోయి భూగర్భజలాలు అడుగంటి పోయాయన్నారు. దీంతో సాగునీరు అందక పొలాలు ఎండిపోతున్నాయన్నారు. ధర్మసాగర్, బొమ్మకూరు నుంచి నీటిని విడుదల చేసి ఈ ప్రాంతంలో ఉన్న కుడి, ఎడమ కాల్వల ద్వార నీటిని మళ్లించి రైతుల పంటలకు సాగునీరు అందించి ఆదుకుంటామని హామీ ఇచ్చారు.
అనంతరం చేర్యాల మండలంలోని అర్జున్ పట్ల, కమలాయపల్లి గ్రామాల్లో పర్యటించి తపాస్పల్లి రిజర్వాయరుకు సంభందించిన డి3, రంగనాయక్ సాగర్ ఎల్డీ10 కాల్వలను పరిశీలించారు. త్వరలో నీటి పారుదలశాఖ మంత్రి ఉత్తమ్ కుమార్ రెడ్డితో మాట్లాడి సమస్య పరిష్కరిస్తానని చెప్పారు. ఆయన వెంట కొమ్ము నర్సింగరావు, కాటం మల్లేశం, రాములు ఉన్నారు.
