వరంగల్, వెలుగు: ఉమ్మడి ఓరుగల్లు జనాలు త్వరలోనే కొత్త వరంగల్ చూడబోతున్నారని ఎంపీ కడియం కావ్య, మేయర్ గుండు సుధారాణి, ఎమ్మెల్యేలు నాయిని రాజేందర్రెడ్డి, కేఆర్ నాగరాజు తెలిపారు. సీఎం రేవంత్రెడ్డి వరంగల్పై ప్రత్యేక దృష్టి పెట్టారని తెలిపారు. రాష్ట్ర ప్రభుత్వం గ్రేటర్ వరంగల్లో పలు అభివృద్ధి పనులకు శ్రీకారం చుట్టిన నేపథ్యంలో ఎమ్మెల్యేలు బుధవారం హనుమకొండ కలెక్టరేట్లో హనుమకొండ, వరంగల్ కలెక్టర్లు, అధికారులతో రివ్యూ నిర్వహించారు.
ఈ సందర్భంగా కావ్య మాట్లాడుతూ మామునూర్ ఎయిర్పోర్ట్ ఏర్పాటుకు 950 ఎకరాలు అవసరం ఉంటే 693 ఎకరాలు కేంద్ర విమానయాన సంస్థ ఆధీనంలో ఉందని, మరో 253 భూసేకరణ జరుగుతోందన్నారు. నగరానికి నష్కల్ నుంచి హసన్పర్తి, నష్కల్ నుంచి చింతలపల్లి వరకు రెండు రైల్వే లైన్లు వస్తున్నట్లు చెప్పారు. మేయర్మాట్లాడుతూ వరంగల్ మాస్టర్ ప్లాన్, అండర్గ్రౌండ్ డ్రైనేజీపై అధికారులు డీపీఆర్ రెడీ చేస్తున్నట్లు పేర్కొన్నారు.
భద్రకాళీ చెరువును రేపటి నుంచి ఖాళీ చేస్తాం..
నగరాభివృద్ధి విషయంలో సీఎం రేవంత్రెడ్డి ఇచ్చిన మాట ప్రకారం ఆర్డర్స్ ఇస్తున్నట్లు వరంగల్ పశ్చిమ ఎమ్మెల్యే నాయిని రాజేందర్రెడ్డి వెల్లడించారు. భద్రకాళి చెరువు పూడికతీత పనుల కోసం రేపటి నుంచే చెరువును ఖాళీ చేయనున్నట్లు చెప్పారు. గ్రేటర్ వరంగల్లో జరిగిన, చేపట్టబోయే అభివృద్ధి పనుల్లో పాల్గొనేందుకు ఈ నెల18న లేదా ఒకట్రెండు రోజులు అటుఇటుగా సీఎం రేవంత్రెడ్డి వరంగల్ పర్యటనకు వస్తున్నారన్నారు. ఎమ్మెల్యే కేఆర్ నాగరాజు మాట్లాడుతూ మామునూర్ ఎయిర్పోర్ట్, ఓఆర్ఆర్, ఐఆర్ఆర్ నిర్మాణానికి భూసమీకరణ చేసి త్వరలోనే శంకుస్థాపన చేస్తామన్నారు. సమావేశంలో కలెక్టర్లు ప్రావీణ్య, సత్య శారద, బల్దియా కమిషనర్ అశ్విని తానాజీ వాఖడే పాల్గొన్నారు.
