- కార్యకర్తలను కాపాడుకోవడానికి ఏమైనా చేస్తా
- నేను మిస్డ్కాల్ ఇస్తే రాష్ట్ర సీఎం ఎవరైనా రావాల్సిందే
- ఎంపీ కోమటిరెడ్డి వెంకట్రెడ్డి
నల్గొండ అర్భన్/ నార్కట్పల్లి, వెలుగు : ఐదు సార్లు గెలిపించిన వారికి ఏమిచ్చి రుణం తీర్చుకోవాలని, కార్యకర్తల కోసం చావడానికైనా చంపడానికైనా సిద్ధమని కాంగ్రెస్ పార్టీ భువనగిరి ఎంపీ కోమటిరెడ్డి వెంకట్రెడ్డి అన్నారు. మంగళవారం ఎంపీ బర్త్డే వేడుకలను నార్కట్పల్లి మండలం బ్రాహ్మణవెల్లంల ప్రాజెక్టు వద్ద నిర్వహించారు. ఈ సందర్భంగా నార్కట్పల్లి నుంచి వెల్లెంల వరకు భారీ ర్యాలీ నిర్వహించారు. వెల్లంల ప్రాజెక్టులో కృష్ణ జలాలకు చీర, సారె, కుంకుమను సమర్పించి పూజలు చేశారు. అక్కడి నుంచి ర్యాలీగా వచ్చి మీటింగ్వద్ద కేక్ కట్ చేసి మాట్లాడారు. వచ్చే మూడు నెలలు కాంగ్రెస్ పార్టీ కార్యకర్తలు కష్టపడాలని, అందరి సహకారంతో రాష్ట్రంలో 75 నుంచి 80 సీట్లు కాంగ్రెస్ గెలుస్తుందన్నారు. అసలు ఈ ప్రాంతానికి ఎమ్మెల్యే ఉన్నాడా అని ప్రశ్నించారు.
ఉమ్మడి రాష్ట్రంలో పవర్ ఫుల్ సీఎం వైఎస్ రాజశేఖర్ రెడ్డినే బ్రాహ్మణ వెల్లంలకు మూడుసార్లు తీసుకువచ్చానని, రాష్ట్రంలో ఎవరు సీఎం అయినా తాను మిస్డ్ కాల్ ఇస్తే హెలికాప్టర్లో రావాల్సిందేనన్నారు. బ్రాహ్మణ వెల్లంలలో మోటార్లు బిగించకుండా అధికారులను ప్రజాప్రతినిధులు బెదిరిస్తున్నారని, వచ్చే ఎన్నికల తర్వాత ఈ ఎమ్మెల్యేలు మాజీలై బస్టాండ్లలో బఠానీలు అమ్ముకుంటారని ఎద్దేవా చేశారు. డీసీసీ అధ్యక్షులు శంకర్ నాయక్, పటేల్ రమేశ్రెడ్డి, బీర్ల ఐలయ్య, కుంభ అనిల్ కుమార్ రెడ్డి, దైద రవీందర్, వేదాసు వెంకయ్య, వంగూరు లక్ష్మయ్య, గుమ్మల మోహన్ రెడ్డి, బత్తుల ఉషయ్య గౌడ్, జూలకంటి సైదిరెడ్డి పాల్గొన్నారు.
