నల్గొండ, వెలుగు : పాలమూరు, -రంగారెడ్డి, నల్గొండ జిల్లాల మధ్య సాగునీటి పంపకాల్లో కొత్త చిచ్చు పెట్టేందుకే ప్రభుత్వం 18న జీవో నెం.246 జారీ చేసిందని ఎంపీ కోమటిరెడ్డి వెంకటరెడ్డి మండిపడ్డారు. దీనిపై కేసీఆర్ 4 రోజుల్లోగా స్పందించకపోతే నల్గొండ జిల్లా కేంద్రంలో దీక్ష చేస్తానని, లేదంటే ఆమరణ నిరాహార దీక్షకు దిగుతానని హెచ్చరించారు. అందుకు జిల్లా రైతులు, రైతు సంఘాలు, రిటైర్డ్ ఇంజనీర్లతో సంప్రదించి నిర్ణయం తీసుకుంటానన్నారు. ఆదివారం ఆయన నల్గొండలో విలేకరులతో మాట్లాడారు. వైఎస్సార్ హయాంలో చేపట్టిన ఎస్ఎల్బీసీ టన్నెల్ ప్రాజెక్టు పనులు గాలికి వదిలేశారని, దీనికి అనుసంధానంగా నిర్మిస్తున్న బ్రాహ్మణవెల్లంల ప్రాజెక్టు పనులు కూడా అతీగతీ లేకుండా పోయాయన్నారు.
తెలంగాణ వచ్చాక చేపట్టిన డిండి లిఫ్ట్ ఇరిగేషన్కు నీళ్లియ్యలేదు కానీ, ఇప్పుడు కొత్తగా జీవో 246 తెచ్చి కృష్ణా జలాల్లో ఎస్ఎల్బీసీకి కేటాయించిన 45 టీఎంసీల నీటిని రద్దు చేసేందుకు కేసీఆర్ కుట్ర పన్నారని ఆరోపించారు. దీంతో జిల్లాకు కృష్ణా జలాల నీటి కేటాయింపులో అన్యాయం జరుగుతోందని, ఎస్ఎల్బీసీ, డిండి, బీవెల్లంల ప్రాజెక్టుల పనులు ఆగిపోయి, ఫ్లోరైడ్ ప్రాంతాలైన దేవరకొండ, మునుగోడు, నల్గొండ, నకిరేకల్ నియోజకవర్గాలు సాగు, తాగునీరు లేక సర్వనాశం అవుతాయని వెంకటరెడ్డి పేర్కొ న్నారు.
కృష్ణా జలాల్లో నల్గొండకు వాటా ఇవ్వాల్సిందే
వైఎస్సార్ హయాంలో తాను మంత్రిగా ఉన్నప్పుడు నల్గొండ జిల్లాలో ఫ్లోరైడ్ నివారణకు రూ.600 కోట్లు, జానారెడ్డి మంత్రిగా ఉన్నప్పుడు మరో రూ.500 కోట్లు సాంక్షన్ చేయించానని కోమటిరెడ్డి వెంకటరెడ్డి గుర్తుచేశారు. జిల్లాలో 60, 70 శాతం పూర్తయిన ప్రాజెక్టులను కంప్లీట్ చేయకుండా సీఎం ఉత్తర తెలంగాణలో కాళేశ్వరం పూర్తి చేసుకున్నారన్నారు. అదే ఎస్ఎల్బీసీకి సంబంధించిన డీపీఆర్ రిపోర్ట్ ఇప్పటి వరకు కేంద్రానికి ఎందుకు ఇవ్వలేదని ప్రశ్నించారు. 1978లో జరిగిన ఒప్పందాన్ని తుంగలో తొక్కారని విమర్శించారు.
