హైదరాబాద్, వెలుగు: ఇచ్చిన హామీలు నెరవేర్చకుంటే ప్రజలకు క్షమాపణలు చెప్పి అధికారం నుంచి తప్పుకోవాలని ఎంపీ లక్ష్మణ్ కాంగ్రెస్ పార్టీకి సూచించారు. ఎన్నికల ముందు ఆరు గ్యారంటీలంటూ హామీలు ఇచ్చిందని, ఏడాదైనా అమలు చేయడం లేదని మండిపడ్డారు. బీజేపీ స్టేట్ ఆఫీస్లో గురువారం ఆయన మీడియాతో మాట్లాడారు. ‘‘ఇచ్చిన హామీలు అమలు చేయాలని డిమాండ్ చేస్తుంటే.. కాంగ్రెస్ నేతలు చేతులెత్తేస్తున్నారు.
ఆ పార్టీ వైఫల్యానికి ఇదే నిదర్శనం. రాష్ట్ర ఆర్థిక పరిస్థితులు తెలుసుకోకుండా ఎన్నికల ముందు ఇష్టమొచ్చినట్లు హామీలు ఇచ్చారు. కాంగ్రెస్ నేతలకు బుద్ధి చెప్పేందుకు ప్రజలు సిద్ధంగా ఉన్నరు. హామీలు అమలు చేసేదాకా వెంటాడుతాం. ఆ పార్టీ నేతలను అడ్డుకుని నిలదీస్తాం. ఆరు గ్యారంటీలపై రాహుల్ గాంధీ స్పందించాలి. తెలంగాణతో పాటు కర్నాటక, హిమాచల్ప్రదేశ్లోనూ ఇదే పరిస్థితి ఉన్నది’’అని లక్ష్మణ్ విమర్శించారు. ఎమ్మెల్సీ ఎన్నికల్లో ఉపాధ్యాయులు, గ్రాడ్యుయేట్లు ఆలోచించి ఓటేయాలని కోరారు.
