జహీరాబాద్ సెగ్మెంట్లో ‘బీసీ’ జపం

మూడు ప్రధాన పార్టీల టికెట్లు ఆ వర్గానికే
కాంగ్రెస్, బీజేపీ నుంచి బరిలో లింగాయత్ నేతలు
మున్నూరుకాపు లీడర్ కు టికెట్ ఖరారు చేసిన బీఆర్ఎస్
రసవత్తరంగా పార్లమెంట్ పోరు

కామారెడ్డి, వెలుగు : జహీరాబాద్ పార్లమెంట్ సెగ్మెంట్ పరిధిలో ఈ సారి ప్రధాన పార్టీలన్ని బీసీ మంత్రాన్ని జపిస్తున్నాయి.కాంగ్రెస్, బీజేపీ ఇదివరకే లింగాయత్ సామాజికవర్గానికి చెందిన లీడర్లకు టికెట్ కేటాయించగా, తాజాగా బీఆర్ఎస్ సైతం మున్నూరు కాపు సామాజికవర్గానికి చెందిన నేతకు టికెట్ ఖరారు చేసింది. దీంతో పార్లమెంట్ పోరు రసవత్తరంగా మారనుంది. కామారెడ్డి జిల్లాలోని నాలుగు అసెంబ్లీ నియోజకవర్గాలు, సంగారెడ్డిలోని మూడు నియోజకవర్గాలు జహీరాబాద్ పార్లమెంట్పరిధిలోకి వస్తాయి. మొత్తం 16,24,846 మంది ఓటర్లుండగా

ఇందులో 55 శాతం మంది బీసీలే ఉన్నారు. పార్లమెంట్సెగ్మెంట్పరిధిలోని నారాయణ్ఖేడ్, జహీరాబాద్, జుక్కల్ అసెంబ్లీ నియోజకవర్గాల్లో లింగాయత్ ఓట్లర్ల సంఖ్య అధికంగా ఉండగా, మున్నూరుకాపు, ముదిరాజులు కూడా ఎక్కువగానే ఉన్నారు. కామారెడ్డి జిల్లావ్యాప్తంగా ముదిరాజులు, మున్నూరు కాపులు అధికంగా ఉన్నారు. ఆయా పార్టీల గెలుపోటముల్లో బీసీలు కీలకంగా నిలువనున్నారు.

కుల సమీకరణాలే ప్రధానం

బీఆర్ఎస్ నుంచి వరుసగా రెండుసార్లు గెలిచిన సిట్టింగ్ ఎంపీ బీబీ పాటిల్ ఇటీవల బీజేపీలో చేరారు. పార్టీ మారిన మరుసటి రోజే బీజేపీ పాటిల్ అభ్యర్థిత్వాన్ని ఖరారు చేసింది. కాంగ్రెస్ పార్టీ విడుదల చేసిన మొదటి లిస్ట్లోనే మాజీ ఎంపీ సురేశ్ శెట్కార్ పేరును ప్రకటించింది. పార్లమెంట్ సెగ్మెంట్ పరిధిలో లింగాయత్ ఓటర్ల ప్రాబల్యం ఉన్న నేపథ్యంలో రెండు పార్టీలు కూడా ఆ సామాజికవర్గానికి చెందిన నేతలనే బరిలో నిలిపారు. బీజేపీ నుంచి పలువురు టికెట్ఆశించగా, కుల సమీకరణాల నేపథ్యంలో పార్టీ మాత్రం సిట్టింగ్ ఎంపీగా ఉన్న బీబీపాటిల్ వైపే మొగ్గు చూపింది.

ఈయన సామాజిక వర్గం ఓట్లు ఎక్కువగా ఉండడంతో పాటు బీసీ కార్డు పని చేస్తుందని పార్టీ ముఖ్య నేతలు భావించారు. ఇతర సామాజికవర్గాలకు చెందిన వారికి టికెట్ కేటాయిస్తే బీసీ ఓట్లు చీలి విజయవకాశాలు దెబ్బతింటాయనే ఉద్ధేశంతో కాంగ్రెస్ పార్టీ మాజీ ఎంపీ సురేశ్ శెట్కార్కు టికెట్ కేటాయించింది. అసెంబ్లీ ఎన్నికల్లో ఈయనకు నారాయణ్ఖేడ్ టికెట్ కేటాయించారు. కానీ చివరి నిమిషంలో టికెట్ మార్చి సంజీవ్రెడ్డిని బరిలో నిలిపారు. ఎంపీ టికెట్ఇస్తామని హైకమాండ్ భరోసా ఇవ్వడంతో ఆయన పార్టీ అభ్యర్థి గెలుపు కోసం పనిచేశారు. మాజీ స్పీకర్ పోచారం శ్రీనివాస్రెడ్డి తనయుడు

ఉమ్మడి నిజామాబాద్ జిల్లా డీసీసీబీ చైర్మన్ పోచారం భాస్కర్రెడ్డి బీఆర్ఎస్ నుంచి ఎంపీ టికెట్ ఆశించారు. ఈ నెల 10న జహీరాబాద్ పార్లమెంట్ పరిధిలోని ముఖ్య నేతలతో హైదారాబాద్లో మీటింగ్ నిర్వహించిన కేసీఆర్, ఎంపీ అభ్యర్థిత్వం ఖరారుపై లీడర్ల అభిప్రాయాలు తీసుకున్నారు. కాంగ్రెస్, బీజేపీలు బీసీ సామాజికవర్గాలకు చెందిన అభ్యర్థులను బరిలో దింపిన నేపథ్యంలో, తమ పార్టీ నుంచి కూడా బీసీ నేతనే బరిలో నింపాలనే అభిప్రాయాన్ని వెల్లుబుచ్చారు. ఆ తర్వాత మున్నూరు కాపు సామాజికవర్గానికి చెందిన గాలి అనిల్కుమార్ అభ్యర్థిత్వాన్ని బీఆర్ఎస్ ఖరారు చేసింది. దీంతో టికెట్ఆశించిన భాస్కర్రెడ్డికి నిరాశే మిగిలింది.