- సౌత్ సెంట్రల్ రైల్వే జీఎంను కోరిన ఎంపీ వంశీకృష్ణ, ఎమ్మెల్యే వివేక్ వెంకటస్వామి
- పెద్దపల్లి పార్లమెంట్ సెగ్మెంట్లో రైల్వే సమస్యలను పరిష్కరించాలని వినతి
సికింద్రాబాద్, వెలుగు: సికింద్రాబాద్–నాగపూర్మధ్య కొత్తగా ప్రారంభించిన వందేభారత్రైలుకు మంచిర్యాలలో స్టాప్ ఏర్పాటు చేయాలని సౌత్ సెంట్రల్ రైల్వే జీఎం అరుణ్ కుమార్ జైన్ ను పెద్దపల్లి ఎంపీ వంశీకృష్ణ, చెన్నూరు ఎమ్మెల్యే వివేక్వెంకటస్వామి కోరారు.పెద్దపల్లి పార్లమెంట్ నియోజకవర్గంలో రైల్వే అభివృద్ధి కార్యక్రమాలపై దృష్టి పెట్టాలని, రైల్వే సమస్యలను పరిష్కరించాలని వినతిపత్రం అందజేశారు.
మంగళవారం సికింద్రాబాద్ రైల్నిలయంలో సౌత్ సెంట్రల్ రైల్వే జీఎం అరుణ్కుమార్ జైన్, ప్రిన్సిపల్ చీఫ్ ఆపరేషన్స్ మేనేజర్ నాగ్యతో వంశీకృష్ణ, వివేక్ భేటీ అయ్యారు. అనంతరం మీడియాతో వంశీకృష్ణ మాట్లాడారు. పెద్దపల్లి ప్రాంతంలో కొత్త రైల్వే స్టేషన్లను ఏర్పాటు చేయాలని, కరోనా సమయంలో కొన్ని స్టేషన్లలో రద్దు చేసిన రైల్వే స్టాప్లను పునరుద్ధరించాలని జీఎంను కోరినట్టు ఆయన తెలిపారు.
రవాణా సౌకర్యాలతోనే అభివృద్ధి..
బీఆర్ఎస్హయాంలో పెద్దపల్లి సెగ్మెంట్ ను పట్టించుకోలేదని ఎంపీ వంశీకృష్ణ మండిపడ్డారు. మంచిర్యాల, పెద్దపల్లి నిర్లక్ష్యానికి గురయ్యాయని అన్నారు. ‘‘రవాణా సదుపాయాలు బాగుంటేనే ఏ ప్రాంతమైనా అన్ని రకాలుగా అభివృద్ధి చెందుతుంది. ప్యాసింజర్కనెక్టివిటీ పెరిగితేనే వ్యాపార లావాదేవీలు పెరుగుతాయి. తద్వారా ఆయా ప్రాంతాలు అభివృద్ధి చెందడంతో పాటు మంచి సదుపాయాలు కూడా అందుబాటులోకి వస్తాయి.
పెద్దపల్లి ప్రాంతంపై ప్రత్యేక శ్రద్ధ తీసుకుని కొత్త రైల్వే స్టాప్లు, కొత్త రైల్వే ట్రాక్లు ఏర్పాటు చేయాలని జీఎంను కోరాం. సికింద్రాబాద్-–నాగపూర్మధ్య కొత్తగా ప్రారంభించిన వందేభారత్రైలుతో పాటు కేరళ ఎక్స్ప్రెస్రైలుకు కూడా మంచిర్యాలలో స్టాప్ ఏర్పాటు చేయాలని కోరాం. రామగిరి ఎక్స్ప్రెస్కు మందమర్రిలో స్టాప్ఇవ్వాలని విజ్ఞప్తి చేశాం. తిరుపతి, ఇతర పుణ్య క్షేత్రాలు వెళ్లే భక్తులు అధికంగా ఉన్న నేపథ్యంలో బెల్లంపల్లి నుంచి తిరుపతికి కొత్త ఎక్స్ప్రెస్రైలు ప్రారంభించాలని విన్నవించాం. పెద్దపల్లి పార్లమెంట్ పరిధిలోని అన్ని నియోజకవర్గాలకు రైల్వే కనెక్టివిటీ ఉండేలా చర్యలు చేపట్టాలని కోరాం” అని వెల్లడించారు.
