న్యూఢిల్లీ: మంగళూరు రిఫైనరీ అండ్ పెట్రోకెమికల్స్ లిమిటెడ్ (ఎంఆర్పీఎల్) తమిళనాడు, ఆంధ్రప్రదేశ్, తెలంగాణలలో పెట్రోల్ పంపుల నెట్‌‌‌‌‌‌‌‌‌‌వర్క్‌‌‌‌ను విస్తరించనుంది. రిఫైనరీ పరిసరాల్లోని మార్కెట్లలోకి వస్తామని సంస్థ ఛైర్మన్ తెలిపారు. ఎంఆర్పీఎల్ పెట్రోల్ పంప్ నెట్‌‌‌‌వర్క్ ప్రస్తుతం కర్ణాటక కేరళలో కేంద్రీకృతమై ఉంది. ప్రభుత్వ యాజమాన్యంలోని ఆయిల్ అండ్ నేచురల్ గ్యాస్ కార్పొరేషన్ (ఓఎన్జీసీ)కు అనుబంధ సంస్థ అయిన దీనికి కర్ణాటకలోని మంగళూరులో చమురు శుద్ధి కర్మాగారం ఉంది. దీనికి దగ్గరగా ఉన్న ప్రాంతాలపై దృష్టి సారించి, ఫ్యూయల్ రిటైలింగ్‌‌‌‌లోకి ప్రవేశించింది. "కర్ణాటక, కేరళ రాష్ట్రాల్లో రిటైల్ విస్తరణపై నిరంతరం దృష్టి సారిస్తున్నాం. వివిధ దశలలో నిర్మాణంలో 20 రిటైల్ అవుట్లెట్లు ఉన్నాయి. ఇప్పటివరకు 32 రిటైల్ అవుట్‌‌‌‌లెట్‌‌‌‌లను విజయవంతంగా ప్రారంభించాం" అని చైర్మన్ అల్కా మిట్టల్ చెప్పారు. ప్రస్తుతం ఎంఆర్పీఎల్ యాజమాన్యంలోని అవుట్‌‌‌‌లెట్‌‌‌‌ల సంఖ్య 36 వరకు ఉంది.
రాబోయే 5–-10 సంవత్సరాలలో ప్రతి సంవత్సరం 50 కొత్త పెట్రోల్ పంపులను అందుబాటులోకి తెస్తామని మిట్టల్ చెప్పారు. తమిళనాడు, ఆంధ్ర ప్రదేశ్, తెలంగాణలలోని బంకులను ఏర్పాటు చేస్తామని అన్నారు. భారతీయ ఆటో ఫ్యూయల్ రిటైలింగ్ సెక్టార్లో ప్రభుత్వ రంగ (పీఎస్యూ) సంస్థల ఆధిపత్యం కొనసాగుతోంది. దేశంలోని 83,685 పెట్రోల్ పంపుల్లో ప్రభుత్వ ఆధీనంలోని ఫ్యూయల్ రిటైలర్లు ఇండియన్ ఆయిల్, భారత్ పెట్రోలియం హిందుస్థాన్ పెట్రోలియంలకు 55,035 అవుట్లెట్లు ఉన్నాయి. రాస్నెఫ్ట్ఇన్వెస్ట్మెంట్లు నయారా ఎనర్జీకి 6,635 పెట్రోల్ పంపులు ఉన్నాయి. అయితే రిలయన్స్ ఇండస్ట్రీస్ యూకే బ్రిటిష్ పెట్రోలియం జాయింట్ వెంచర్ 1,470 రిటైల్ అవుట్‌‌‌‌లెట్‌‌‌‌లను ఏర్పాటు చేసింది. షెల్ 326 పెట్రోల్ పంపులను నిర్వహిస్తోంది. కర్ణాటకలో 400లకు పైగా, కేరళలో 100 ప్రాంతాల్లో పెట్రోల్ పంపుల ఏర్పాటుకు ప్రకటనలు ఇచ్చామని ఎంఆర్పీఎల్ తెలిపింది.
