ములుగు(గోవిందరావుపేట)/ తాడ్వాయి, వెలుగు: వర్షాకాలంలో భారీ వరదలతో ముంపుకు గురయ్యే ప్రాంతాలను గుర్తించి రక్షణ చర్యలకు ప్రణాళికలు సిద్ధం చేయాలని ములుగు కలెక్టర్ ఇలా త్రిపాఠి అధికారులను ఆదేశించారు. బుధవారం ఎస్పీ డాక్టర్ శబరీశ్ తో కలిసి గతంలో ముంపుకు గురైన గోవిందరావుపేట మండలం ప్రాజెక్టు నగర్, తాడ్వాయి మండలంలోని ఊరట్టం తూముల వాగును సందర్శించారు. స్థానికులతో మాట్లాడి అధికారులకు పలు సూచనలు చేశారు. ఈ సందర్భంగా కలెక్టర్ మాట్లాడుతూ ముంపు ప్రాంతాల్లో చేపట్టాల్సిన చర్యలు, ఊరట్టం కరకట్ట నిర్మాణానికి ప్రతిపాదనలు సిద్ధం చేయాలని చెప్పారు. కార్యక్రమలో ఇరిగేషన్ ఈఈ నారాయణ, డీఎస్పీ రవీంద్ర, డీఈలు శ్రీనివాస్, సదయ్య, ఏఈ హర్షద్, ప్రశాంత్ తదితరులు పాల్గొన్నారు.
