- హంతకుడిని పట్టిచ్చిన సెల్ఫీ
ముంబై: రైల్లో ప్రయాణిస్తూ సెల్ఫీ వీడియో తీసుకుంటుండగా అతడి ఫోన్ కొట్టేసేందుకు ప్రయత్నించాడో దొంగ. అలర్ట్ అయిన ప్రయాణికుడు అతడికి తన ఫోన్ను చిక్కనివ్వలేదు. చేసేదేంలేక ఆ దొంగ పరారయ్యాడు. పారిపోతున్న అతడిని ప్యాసింజర్ వీడియో తీసి సోషల్ మీడియాలో పోస్ట్ చేశాడు. దాని ఆధారంగా పోలీసులు దొంగను పట్టుకున్నారు. ఆ దొంగ వద్ద ఉన్న గతంలో చోరీ చేసిన ఫోన్ ఆధారంగా పోలీసులు మరో ప్రయాణికుడి డెత్ మిస్టరీని ఛేదించారు. మహారాష్ట్రలోని కల్యాణ్ రైల్వే స్టేషన్ పరిధిలో శుక్రవారం ఈ ఘటన జరిగింది.జాహీద్ అనే ప్యాసింజర్ రైల్లో సెల్ఫీ వీడియో తీసుకుంటుండగా ఆకాశ్ జాదవ్ ఫోన్ కొట్టేసేందుకు ప్రయత్నించాడు. జాహీద్ ఎదురుతిరగడంతో ఆకాశ్ పారిపోయాడు. ఈ క్రమంలో రికార్డయిన వీడియో ఆధారంగా పోలీసులు ఆకాశ్ను గురువారం అరెస్ట్ చేశారు. అతడి నుంచి స్వాధీనం చేసుకున్న ఫోన్ను గతంలో రైల్వే ట్రాక్పై పడి ప్రాణాలు కోల్పోయిన పుణె వాసి ప్రభాస్ బాంగేదిగా గుర్తించారు. జాదవ్ ఫోన్ దొంగిలించే క్రమంలోనే ప్రభాస్ రైల్లోంచి కిందపడ్డాడని విచారణలో తేలినట్లు పోలీసులు వెల్లడించారు.
