మూసీలో అసంపూర్తి ఇండ్ల నేలమట్టం

• అసాంఘిక కార్యకలాపాలకు అడ్డాగా మారడంతో పూర్తిగా కూల్చేసిన అధికారులు

హైదరాబాద్ సిటీ/మలక్​పేట, వెలుగు: మూసీ రివర్ బెడ్లో నాలుగు నెలల కింద అసంపూర్తిగా కూల్చిన ఇండ్లను అధికారులు పూర్తిగా నేలమట్టం చేస్తున్నారు. చాదర్​ఘాట్లోని శంకర్​నగర్, మూసానగర్లోని ఇండ్ల గోడలను బుధవారం కూల్చివేశారు. తర్వాత శిథిలాలను తరలించారు. మూసీ బ్యూటిఫికేషన్లో భాగంగా రివర్ బెడ్లో నిర్మించిన ఇండ్లను తొలగించాలని నాలుగు నెలల కింద ప్రభుత్వం నిర్ణయిచింది. ఆ ఇండ్లల్లో ఉంటున్న వారికి డబుల్ బెడ్​రూం ఇండ్లు ఇచ్చి అందులోకి తరలించింది. ఆ వెంటనే ఇండ్లను కూల్చడం ప్రారంభించింది. ప్రతిపక్ష పార్టీల ఆందోళనలతో కూల్చివేతలు కొన్నాళ్లు నిలిచిపోయాయి. 

ప్రస్తుతం ఆ ఇండ్లు ఖాళీగా ఉండడంతో ఆకతాయిలకు అడ్డాగా మారాయి. రోజూ రాత్రిళ్లు తాగుబోతులు, గంజాయి బ్యాచ్​తిష్ట వేస్తున్నారని  స్థానికుల నుంచి ఫిర్యాదులు వస్తున్నాయి. రంగంలోకి దిగిన అధికారులు బుధవారం అసంపూర్తిగా కూల్చిన ఇండ్లను జేసీబీలతో పూర్తిగా తొలగించడం ప్రారంభించారు. చాదర్ ఘాట్ శంకర్​నగర్ ప్రాంతంలో రివర్ బెడ్ లో ఉన్న కట్టడాలను పూర్తిగా నేలమట్టం చేశారు. మిగతా ప్రాంతాల్లో కూడా పూర్తిగా తొలగించి రివర్ బెడ్ వెంట గోడ కట్టనున్నారు.

ఆందోళన వద్దు: ఎమ్మెల్యే బలాల
మూసీలో మళ్లీ కూల్చివేతలు అంటూ మీడియాలో తప్పుడు ప్రచారం జరుగుతోందని, అలాంటి వదంతలును నమ్మొద్దని మలక్​ పేట ఎమ్మెల్యే అహ్మద్ బిన్ అబ్దుల్లా బలాల కోరారు. ఇండ్లను అసంపూర్తిగా కూల్చడంతో అసాంఘిక కార్యకలాపాలకు అడ్డాగా మారాయని, దీనిపై తనకు, అధికారులకు పలుమార్లు కంప్లయింట్స్ వచ్చాయన్నారు. స్థానికులకు ఇబ్బందులు ఎదురవుతున్నందున పూర్తిగా కూల్చేసి, శిథిలాలను తొలగిస్తున్నారని చెప్పారు.