మూసీ ప్రాజెక్టుకు రూ.5,863 కోట్లు..ప్రిలిమినరీ రిపోర్టులో సర్కార్ వెల్లడి

• ఇందులో ప్రభుత్వ ఖర్చు 1,763 కోట్లు.. మిగతాది ఆర్థిక సాయం 
• 2030 డిసెంబర్ 30 నాటికి పూర్తి చేయాలని టార్గెట్ 

హైదరాబాద్, వెలుగు: మూసీ పునరుజ్జీవం ప్రాజెక్టును నాలుగు ప్రధాన భాగాలుగా చేపట్టనున్నట్టు ప్రిలిమినరీ రిపోర్టులో మూసీ రివర్​ఫ్రంట్ ​డెవలప్​మెంట్​కార్పొరేషన్​ పేర్కొంది. ఐదేండ్లలో రూ.5,863 కోట్లతో ప్రాజెక్టును చేపట్టనున్నట్టు తెలిపింది. అందులో రాష్ట్ర ప్రభుత్వ వాటా రూ.1,763 కోట్లు కాగా.. బయటి నుంచి రూ.4,100 కోట్ల ఆర్థిక సాయం పొందుతామని చెప్పింది. 2030 డిసెంబర్​30 నాటికి ప్రాజెక్టును పూర్తి చేసేలా టార్గెట్ ​పెట్టుకున్నట్టు పేర్కొంది. మొదటి యాక్టివిటీలో భాగంగా నదీ జలాల శుద్ధితో పాటు నీటి నిర్వహణ, వరదల నియంత్రణ వ్యవస్థ, వర్షపు నీటి నిర్వహణను చేపట్టనున్నారు.

రెండో యాక్టివిటీగా ల్యాండ్​స్కేప్​ను అభివృద్ధి చేసి నది సహజసిద్ధమైన లక్షణాన్ని రీస్టోర్​ చేయనున్నారు. మూడో యాక్టివిటీలో భాగంగా రివర్ కారిడార్​లో ట్రాన్స్​పోర్ట్​హబ్​లను ఏర్పాటు చేసి రవాణా వ్యవస్థను మెరుగు పరుస్తారు. నాలుగో యాక్టివిటీలో భాగంగా పునరుజ్జీవ పథకం ద్వారా ఆదాయాన్నిచ్చే అంశాలపై దృష్టి సారించి కల్చరల్ రీసోర్సెస్​ను గుర్తించనున్నారు. హైదరాబాద్​ సాంస్కృతిక వారసత్వాన్ని కాపాడుకుంటూనే మూసీ నదిని శుద్ధి చేస్తామని రిపోర్ట్​లో పేర్కొంది. టూరిజం డెవలప్​ చేసేలా ఈస్ట్​‌‌‌‌–వెస్ట్​ కారిడార్​నిర్మాణాన్ని చేపట్టనుంది. నదీ తీరాలను పటిష్ఠపరిచి వరద నియంత్రణ చర్యలు చేపట్టడం ద్వారా వరద ముప్పును తగ్గించనుంది. నదీ తీరంలో నివసిస్తున్న వారి ఉపాధిని మెరుగుపరచనుంది.  

ఇన్వెస్టర్లను ఆకర్షించేలా..

రాష్ట్రంలో పెట్టుబడులను ఆకర్షించేలా మూసీ చుట్టూ వివిధ ప్రాజెక్టులను డెవలప్​చేయనున్నట్టు రిపోర్టులో కార్పొరేషన్ పేర్కొంది. పర్యావరణంపై ప్రభావాన్ని తగ్గించేందుకు చర్యలు చేపట్టనున్నట్టు తెలిపింది. రీసైకిల్ చేసిన వస్తువులతో పర్మియేబుల్​పేవ్​మెంట్ల నిర్మాణం, రెయిన్​గార్డెన్స్​వంటి వాటిని ఏర్పాటు చేయనున్నట్టు చెప్పింది. క్లైమేట్ చేంజ్​ను దృష్టిలో పెట్టుకుని గ్రీన్​రూఫ్​లను ఏర్పాటు చేసి అర్బన్​హీట్​ఐలాండ్​ఎఫెక్ట్​ను తగ్గించనుంది. తద్వారా కాలుష్యాన్ని తగ్గించేందుకు కసరత్తు చేస్తున్నది. విపత్తులను తగ్గించేందుకు ఎలివేటెడ్​స్ట్రక్చర్లు, ఫ్లడ్​బారియర్లు వంటి వాటిని నిర్మించనుంది. వరద ముప్పును ముందే పసిగట్టేలా, వనరుల కేటాయింపు, ప్లానింగ్​అండ్​మెయింటెనెన్స్​ను మరింత మెరుగుపరిచేందుకు స్మార్ట్​టెక్నాలజీని మూసీ పొడవునా ఏర్పాటు చేయనుంది. 

ప్రైవేట్ ​ఫండింగ్..

పబ్లిక్, ప్రైవేట్ పార్ట్​నర్​షిప్​ద్వారా (పీపీపీ) టూరిజం, హాస్పిటాలిటీ, రియల్ ఎస్టేట్​సెక్టార్స్​తో పాటు సీఎస్ఆర్​ఫండింగ్​ద్వారా ప్రాజెక్టుకు ఫైనాన్స్ సమకూర్చనున్నట్టు రిపోర్ట్​లో కార్పొరేషన్ పేర్కొంది. పర్యావరణ హితమైన కాంపొనెంట్ల ఏర్పాటుకు సంబంధించి గ్రీన్​బాండ్లను జారీ చేయనున్నట్టు తెలిపింది. ప్రైవేటు కంపెనీల భాగస్వామ్యంతో ప్రాజెక్టులో కీలకమైన కాంపొనెంట్ల నిర్మాణం, ఇంజనీరింగ్, పర్యావరణ నిర్వహణ వంటి వాటికి సంబంధించి నైపుణ్యాలను అందిపుచ్చుకోవచ్చని చెప్పింది.