ఒకప్పటి గడీల కాలాన్ని కళ్లకు కట్టిన సినిమా ‘దొరసాని’. స్పేస్లో ఉండే పరిస్థితుల్ని తెర మీదకి తీసుకొచ్చింది ‘అంతరిక్షం’ సినిమా. అందమైన ప్రేమకథతో ఆకట్టుకుంది ‘మెంటల్ మదిలో’. ఈ మూడు సినిమా కథలు ఒకదానికొకటి పూర్తిగా భిన్నం. కానీ, డిఫరెంట్ జానర్స్లో వచ్చిన ఈ మూడు సినిమాల్లో ఒక కామన్ పాయింట్ ఉంది. అదే ప్రశాంత్ ఆర్ విహారి. కథనమే హీరోగా నడిచిన ఈ మూడు సినిమాలకి మ్యూజిక్ ఇచ్చింది ఇతనే. కెరీర్ స్టార్టింగ్ నుంచే బ్యాక్ గ్రౌండ్ స్కోర్లో తనదైన మార్క్ చూపిస్తున్న ఈ మ్యూజిక్ డైరెక్టర్ మన తెలంగాణ పిలగాడే.
అమ్మ ఇంజినీరింగ్ డిపార్ట్మెంట్లో ఉద్యోగం చేస్తోంది. నాన్న బ్యాంక్ మేనేజర్. కానీ, ప్రశాంత్కేమో చదువు, ఉద్యోగం కంటే పాటలే ఇష్టం. అందుకే బీటెక్ చదివినా మ్యూజిక్ డైరెక్షన్ వైపు అడుగులు వేశాడు. అతని ఆలోచనకి అమ్మానాన్న కూడా అండగా నిలిచారు. దాంతో చెన్నై ట్రైన్ ఎక్కి ఎ.ఆర్. రెహమాన్ కె.ఎమ్ మ్యూజిక్ కన్జర్వేటరి ( కెఎమ్ఎమ్సి)’లో జాయిన్ అయ్యాడు. ఆ ఇనిస్టిట్యూట్నే ఎందుకు ఎంచుకున్నానో తెలియాలంటే ‘రోజా’ సినిమా నుంచి కథ మొదలుపెట్టాలంటూ.. ఇలా చెప్పుకొచ్చాడు...
ఆ ఆలోచనే లేదు
‘‘మా ఫ్యామిలీలో ప్రొఫెషనల్ సింగర్స్ ఎవరూ లేరు. కానీ, అందరూ శృతిలో పాడతారు. అమ్మానాన్న భజనలు బాగా పాడతారు. అవి వింటూ నేనూ పాడటం నేర్చుకున్నా. నా గొంతు బాగుండటంతో నాన్న స్పెషల్ ఇంట్రెస్ట్ తీసుకుని, రోజూ నాతో భజనలు ప్రాక్టీస్ చేయించారు. చుట్టు పక్కల ఏ మ్యూజిక్ కాంపిటీషన్ జరిగినా తీసుకెళ్లారు. కర్నాటక సంగీతంలోనూ చేర్పించారు. కానీ, ఎప్పుడూ కుదురుగా ఒకచోట కూర్చొని మ్యూజిక్ నేర్చుకోలేదు నేను. ఒక ఆరు నెలలు కంటిన్యూస్గా క్లాస్లకి వెళ్తే మరో సంవత్సరం బ్రేక్ ఇచ్చేవాడ్ని. దాంతో నలుగురైదుగురు గురువులు మారుతూ వచ్చారు నాకు. అయితే సెల్ఫోన్లు వచ్చిన కొత్తలో నాన్న నా పాటల్ని రికార్డ్ చేసి వినిపించేవాళ్లు. ఆ ఎక్స్పీరియెన్స్ చాలా థ్రిల్లింగ్గా అనిపించేది. అవి విని ఇంకా బాగా పాడాలనుకునేవాడ్ని. అయితే మ్యూజిక్ని కెరీర్గా చేసుకోవాలన్న ఆలోచన అప్పట్లో నా మైండ్లో లేదు. కానీ, ఏదైనా క్రియేటివ్గా చేయాలనుకునేవాడ్ని. అదే నన్ను మ్యూజిక్ వైపు నడిపించి ఈ స్థాయికి తీసుకొచ్చింది.
రెహమాన్ ఇన్స్పిరేషన్తో..
ఒక పక్క పాటల్ని అంటి పెట్టుకొని ఉంటూనే.. వరంగల్ కిట్స్లో బీటెక్ పూర్తిచేశా. కానీ, ఆ తర్వాత నలుగురిలో ఒకడిలా ఉద్యోగం చేయాలనిపించలేదు. నాకిష్టమైన మ్యూజిక్నే ప్రొఫెషన్గా మార్చుకోవాలి అనుకున్నా. అందుకోసం చెన్నైలోని ఎ. ఆర్.రెహమాన్ ఇనిస్టిట్యూట్లో ట్రైన్ అవ్వాలనుకున్నా. రెహమాన్ గారి ఇనిస్టిట్యూట్నే ఎంచుకోవడానికి కారణం ఆయనపై ఉన్న అభిమానమే. ఊహ తెలిసినప్పట్నించీ నేను రెహమాన్గారి పాటలే ఎక్కువగా వినేవాడ్ని. ముఖ్యంగా ఆయన మ్యూజిక్లో వచ్చిన ‘రోజా’ నా ఆల్టైం ఫేవరెట్ ఆల్బమ్. ఆ సినిమాలోని‘పరువం వానగా..’ పాటంటే చాలా ఇష్టం. ఆయన ట్యూన్స్ కట్టిన ‘దొంగ దొంగ’ సినిమాలోని పాటలంటే కూడా ఇష్టం. ఆ ట్యూన్స్ విని ఇన్స్పైర్ అయి నేనూ మ్యూజిక్ డైరెక్టర్ అవ్వాలనుకున్నా. అందుకోసం ఆయన ఇనిస్టిట్యూట్లోనే చేరాలనుకున్నా. ఇదే విషయం ఇంట్లో చెబితే అమ్మానాన్న కూడా ఓకే అన్నారు. కాకపోతే ఏదైనా ఉద్యోగం చేసుకుంటూ సినిమా ప్రయత్నాలు చేయమన్నారు.
యూట్యూబ్ నుంచి సినిమాల్లోకి...
ఆ ఆలోచనతోనే చెన్నై వెళ్లా. కానీ, అక్కడికెళ్లాక ఉద్యోగ ప్రయత్నాలు పూర్తిగా పక్కనపెట్టి మ్యూజిక్పైనే కాన్సన్ట్రేట్ చేశా. రెహమాన్ స్కూల్లో పియానో నేర్చుకునేందుకు చేరా. నేను ఎంచుకున్నది పార్ట్ టైం కోర్స్ కావడంతో మిగిలిన టైంలో అదే ఇనిస్టిట్యూట్లోని ‘సూఫీ ఎన్సెబుల్’ బ్యాండ్లో మెంబర్గా చేరా. రెహమాన్ చేసిన కొన్ని సినిమాలకి కోరస్లు కూడా పాడా. ఆ తర్వాత మ్యూజిక్ డైరెక్షన్ ప్రయత్నాలు మొదలుపెట్టా. అదే టైంలో నా బీటెక్ ఫ్రెండ్ విశ్వక్ ఎల్వీ ప్రసాద్ ఫిల్మ్ అకాడమీలో డైరెక్షన్ కోర్సులో చేరాడు. నా ట్యూన్స్ విని ఎల్వీ ప్రసాద్ అకాడమీలోని తన ఫ్రెండ్స్ తీస్తున్న కొన్ని షార్ట్ ఫిల్మ్స్కి నన్ను రికమెండ్ చేశాడు. లక్కీలీ అవన్నీ ఓకే అయ్యాయి. ఆ వెంటనే ఒక యూట్యూబ్ ఛానెల్ కోసం ఫేమస్ తమిళ పోయెట్ సుబ్రహ్మణ్య భారతి రాసిన పోయమ్స్కి ట్యూన్స్ కట్టా. ఆ ఆల్బమ్ సూపర్ హిట్ అవడంతో తెలుగులో నా డెబ్యూ మూవీ ‘వెళ్లిపోమాకే..’ డైరెక్టర్ యాకూబ్ అలీ కాంటాక్ట్ అయ్యారు. అయితే ఆ సినిమాని ఫ్యూచర్ ప్రాజెక్ట్స్కి ఒక డెమోలానే అనుకున్నాం మేము. కానీ, ఆ సినిమా ట్రైలర్ బాగా నచ్చడంతో హీరో నాని సోషల్ మీడియాలో షేర్ చేశారు. అది చూసి దిల్రాజు తన బ్యానర్లోనే సినిమా రిలీజ్ చేయడానికి ముందుకొచ్చారు. అలా సినిమాకి మంచి హైప్ వచ్చింది.
మొదటి అవకాశం
‘వెళ్లిపోమాకే’ ట్రైలర్లో ఆర్.ఆర్. ( రీ– రికార్డింగ్) నచ్చి మధుర శ్రీధర్రెడ్డి నన్ను ప్రొడ్యూసర్ రాజ్ కందుకూరికి పరిచయం చేశారు. ఆయనకి కూడా నా మ్యూజిక్ నచ్చడంతో ఆయన ప్రొడ్యూస్ చేస్తున్న ‘మెంటల్ మదిలో’ సినిమాకి మ్యూజిక్ డైరెక్టర్గా అవకాశం ఇచ్చారు. ఆ సినిమాలోని పాటలతో పాటు బ్యాక్ గ్రౌండ్ మ్యూజిక్కి కూడా మంచి పేరు వచ్చింది. ఆ సినిమా చూసి రాహుల్ రవీంద్ర ‘చి. ల. సౌ’ సినిమాకి అడిగారు. ఆ తర్వాత చేసిన ‘అంతరిక్షం’, ‘దొరసాని’ సినిమాలు కూడా నా కెరీర్కి బాగా హెల్ప్ అయ్యాయి. ఈ మధ్య రిలీజ్ అయిన ‘రాజా విక్రమార్క’ సినిమా పాటలు కూడా నాకు మంచి గుర్తింపు ఇచ్చాయి. ప్రస్తుతం నేను మ్యూజిక్ ఇచ్చిన ‘బొమ్మ బ్లాక్ బస్టర్’, ‘పంచతంత్రం’, ‘స్కైలాబ్’ సినిమాలు రిలీజ్కి రెడీగా ఉన్నాయి. ‘బేకర్ అండ్ బ్యూటీ’ వెబ్ సిరీస్కి మ్యూజిక్ చేసింది కూడా నేనే. అలాగే కెరీర్ స్టార్టింగ్లో కొన్ని హిందీ, తమిళ, మలయాళం షార్ట్ ఫిల్మ్స్కి మ్యూజిక్ ఇచ్చా రెండు మిర్చి మ్యూజిక్ అవార్డ్స్ కూడా అందుకున్న.
కొత్తదనం చూడొచ్చు
కొత్త మ్యూజిక్ డైరెక్టర్స్ మీద త్వరగా ఒక ఒపీనియెన్కి వచ్చేస్తుంది ఇండస్ట్రీ. ఇంతకుముందు చేసిన ప్రాజెక్ట్స్ చూసి, ‘వీళ్లు ఇలాంటి మ్యూజిక్ మాత్రమే చేయగలరు, వాళ్లు అలాంటి ప్రాజెక్ట్స్ మాత్రమే డీల్ చేయగలర’ని ఒక అంచనాకి వస్తారు. కానీ, ఏ మ్యూజిక్ డైరెక్టర్ అయినా కథని బట్టే మ్యూజిక్ ఇస్తాడు. అది అర్థం చేసుకుని అప్కమింగ్ మ్యూజిక్ డైరెక్టర్స్ని ఎంకరేజ్ చేస్తే మ్యూజిక్లో కొత్తదనం వస్తుంది. అందుకు నేనే ఎగ్జాంపుల్.. ‘వెళ్లిపోమాకే’ చూసి ‘అంతరిక్షం’ సినిమాకి నన్ను సెలక్ట్ చేశారు సంకల్ప్ రెడ్డి. రెండూ డిఫరెంట్ జానర్స్ అయినా నా కంపోజింగ్పై నమ్మకం ఉంచారాయన. ఆ నమ్మకాన్ని నిలబెట్టేలానే నేను మ్యూజిక్ చేశా అనుకుంటున్నా. అలా అప్కమింగ్ మ్యూజిక్ డైరెక్టర్స్ అందరికీ అవకాశాలు వస్తే మ్యూజిక్లో మరెన్నో ఎక్స్పరిమెంట్స్ చూడొచ్చు అని ముగించాడు ప్రశాంత్.
మార్కెట్ ముఖ్యమే
మన తెలుగు సినిమా స్కేల్ రోజురోజుకి పెరుగుతోంది. దానికి తగ్గట్టే కొత్త కథలు వస్తున్నాయి. మ్యూజిక్ కూడా కొత్త రంగులు అద్దుకుంటోంది. గత నాలుగైదేళ్ల నుంచి మ్యూజిక్ చాలా మారుతోంది. అయితే పాట హిట్ అయితే సినిమాకి ఎంత ప్లస్ అవుతుందో.. సినిమా ఆడినా అందులోని పాటలకి అంతే హైప్ వస్తుందనేది నా అభిప్రాయం. అలాగే పాట పాడిన సింగర్ మీద కూడా ఆ పాట రిజల్ట్ ఆధారపడి ఉంటుంది. మార్కెట్ ఉన్న సింగర్ పాడితే పాటలు త్వరగా జనాల్లోకి వెళ్తాయి.
గుర్తింపు కోసం పనిచేయను
ఫలానా పాటకో, సినిమాకో మ్యూజిక్ కంపోజ్ చేస్తే గుర్తింపు వస్తుందని నేను పనిచేయలేదు. అలా చేయను కూడా. మంచి కథాబలం ఉన్న సినిమాలకి మ్యూజిక్ ఇవ్వాలనుకుంటున్నా. డిఫరెంట్ జానర్స్ ట్రై చేయాలనుకుంటున్నా. పర్సనల్ లైఫ్ విషయానికొస్తే 2020లోనే పెళ్లయింది. నా బెటరాఫ్ లలిత. తను సాఫ్ట్వేర్ ఇంజినీర్
హైలెట్
రెహమాన్, ఇళయరాజా మ్యూజిక్ ఎక్కువగా వింటుంటా.
డాక్యుమెంటరీలు, సినిమాలు బాగా చూస్తా.
వెజ్లో ఏ వంటకం పెట్టినా తింటా.
కర్నాటక మ్యూజిక్ బాగా వింటా.
సింగర్స్ హరి హరణ్, ప్రశాంత్, చిన్మయి, సిద్ శ్రీరామ్ గొంతులంటే చాలా ఇష్టం.
::: ఆవుల యమున
