జనగామ, వెలుగు: జనగామ అసెంబ్లీ టికెట్పెండింగ్ ఉండడంతో ఎమ్మెల్యే ముత్తిరెడ్డి యాదగిరి రెడ్డి తన ఆఖరి ప్రయత్నాలు ముమ్మరం చేశారు. మంగళవారం ఎమ్మెల్సీ కవితను హైదరాబాద్ లోని ఆమె నివాసంలో కలిశారు. తన సతీమణి పద్మలతారెడ్డి స్వయంగా గీసిన చిత్రాల లామినేషన్ ఫొటోలను బహూకరించారు. కుటుంబ సభ్యులతో కలిసి వెళ్లిన ఆయన తన అభ్యర్థిత్వాన్ని సీఎం కేసీఆర్ దృష్టికి తీసుకెళ్లాలని కోరారు. నిత్యం ప్రజలకు అందుబాటులో ఉంటూ సిట్టింగ్ఎమ్మెల్యేగా ఉన్న తనకే మళ్లీ టికెట్ ఇచ్చేలా చూడాలని విన్నవించారు.
హరిత ప్లాజా ఘటన నుంచి శతవిధాలా ప్రయత్నాలు చేస్తున్న ముత్తిరెడ్డికి కేసీఆర్ ను కలిసే చాన్స్ దక్కడం లేదు. ఈ క్రమంలో కేటీఆర్ అందుబాటులో లేకపోవడంతో ఎమ్మెల్సీ కవిత పైనే ఆశలు పెంచుకున్నారు. మూడో సారి అవకాశం కోసం పాట్లు పడుతున్నారు. కాగా ఎమ్మెల్సీ పల్లా రాజేశ్వర్ రెడ్డికి జనగామ టికెట్ కేటాయించినట్లు ప్రచారం జరుగుతోంది. మరో వైపు ఇదే సీటును ఎమ్మెల్సీ పోచంపల్లి శ్రీనివాస్ రెడ్డి, బీసీ సామాజిక వర్గం నుంచి మాజీ ఆప్కో చైర్మన్ మండల శ్రీరాములు కూడా ఆశిస్తున్నారు. దీంతో 25న తుది జాబితా ప్రకటించే వరకు జనగామ బీఆర్ఎస్ శ్రేణులకు ఉత్కంఠ తప్పేలా లేదు.
