వివాహేతర సంబంధమే హత్యకు కారణం
నలుగురిపై కేసు నమోదు, ప్రధాన నిందితుడి అరెస్టు
ఆదిలాబాద్టౌన్, వెలుగు: జిల్లాలో ఇటీవల జరిగిన జంట హత్య కేసుల మిస్టరీని పోలీసులు ఛేదించారు. వివాహేతర సంబంధమే హత్యకు కారణమని నిర్ధారించారు. మంగళవారం ఎస్పీ డి.ఉదయ్కుమార్రెడ్డి తెలిపిన వివరాల ప్రకారం.. పట్టణంలోని కేఆర్కే కాలనీకి చెందిన సొంకంటే అశ్వినికి 12 సంవత్సరాల క్రితం సుందరయ్య కాలనీకి చెందిన సౌకాంబ్లే రమేశ్తో వివాహం జరిగింది. వారికి 8 సంవత్సరాల కుమారుడు, 4 సంవత్సరాల కుమార్తె ఉన్నారు. మూడు నెలల నుంచి అశ్విని పట్టణంలోని భుక్తాపూర్కు చెందిన ఎమ్డి.రెహమాన్ తో సన్నిహితంగా ఉంటోంది. గత నెల 28న రమేశ్ తన భార్య అశ్విని కోసం కేఆర్కే కాలనీకి వెళ్లగా అక్కడ లేకపోవడంతో కుమారుడిని తీసుకొని భార్యను వెతకడానికి వెళ్లారు.
వారిద్దరు గతంలో గుడిహత్నూర్ మండలం సీతాగోంది అటవీ ప్రాంతంలో కలుసుకున్న చోటును కుమారుడు చూపించగా అక్కడే అశ్విని , రెహమన్ కనిపించారు. దీంతో ఆగ్రహానికి గురైన రమేశ్ రెహమాన్ తలపై కర్రతో దాడి చేయడంతో అక్కడికక్కడే మృతి చెందాడు. అశ్వినిని రమేశ్ చెల్లెల్లు స్వప్న, శీల, బావ వెంకటేశ్ పట్టుకోగా రమేశ్కర్రతో ఆమె నుదిటిపై కొట్టడంతో చనిపోయింది. ప్రధాన నిందితుడు రమేశ్ను అరెస్టు చేసి, సహకరించిన నలుగురిపై కేసులు నమోదు చేసినట్లు వెల్లడించారు. సమావేశంలో ఉట్నూర్ డీఎస్పీ సీహెచ్. నాగేందర్ సీఐలు, ఎస్సైలు తదితరులు పాల్గొన్నారు.
