- నాఫెడ్ తీరుపై రైతుల ఆందోళన
- క్వాలిటీ లేదంటూ సోయా రిటర్న్
- కొనుగోలు సెంటర్లు నడుపుతున్న సింగిల్ విండోలపై ఆర్థిక భారం
- కలెక్టర్ను కలిసిన రైతులు
నిజామాబాద్, వెలుగు: సోయాబీన్ పంట కొనుగోలులో నాఫెడ్ తీరు రైతులను నష్టాలకు గురిచేస్తోంది. శాంపిల్స్ ఒకే చేసి కొనుగోలు సెంటర్ల నుంచి సరుకు తెప్పించుకున్నాక కొర్రీలు పెట్టి వాపస్ పంపుతోంది. దీంతో ట్రాన్స్పోర్టు, హమాలీ భారం సెంటర్ల నిర్వహిస్తున్న సింగిల్ విండోలపై పడుతోంది. కమీషన్ ఆశతో సోయా కొనుగోలు చేయకపోవడంతో అసలుకే ఎసరు వస్తోంది. రిజెక్ట్ అయిన సోయా బహిరంగ మార్కెట్లో అమ్ముదామనుకుంటే తక్కువ ధరకు అడుగడంతో రైతులు ఆందోళన చెందుతున్నారు.
వడ్ల కాంటాలతో సోయా కొనుగోళ్లకు ఎఫెక్ట్
ఈ ఖరీఫ్లో నిజామాబాద్ జిల్లాలో 23 వేల ఎకరాల విస్తీర్ణంలో సోయాబీన్ పంటను సాగుచేశారు. అందులో బోధన్, సాలూరా, కోటగిరి, రెంజల్ మండలాల్లోనే 20 వేల ఎకరాలు ఉంది. ఆర్మూర్, బాల్కొండలో మూడు వేల ఎకరాలు పండించారు. అక్టోబర్ లో కోతలు ముగిశాయి. కేంద్ర ప్రభుత్వఆధ్వర్యంలో నాఫెడ్ నుంచి క్లియరెన్స్ వచ్చాక మార్క్ఫెడ్ మధ్యవర్తిత్వంలో సింగిల్ విండోలకు సోయా కొనుగోళ్ల బాధ్యత అప్పగించారు. క్వింటాల్ సోయాబీన్కు కేంద్రం రూ.4,892 మద్ధతు ధర ప్రకటించగా సింగిల్ విండోలకు రూ.50 చొప్పున కమీషన్ చెల్లిస్తుంది.
నవంబర్ లో ధాన్యం కొనుగోలు జరిగినందున సోయా కాంటాలు పక్కన బెట్టి ఇప్పుడు మళ్లీ షురూ చేశారు. పంట సాగు చేసిన మండలాల్లో సింగిల్ విండోలు కొనుగోలు కేంద్రాలను నడుపుతున్నాయి. సారంగాపూర్లోని సీడబ్ల్యూసీ గోదాం ఇన్చార్జ్కు సోయా శాంపిళ్లు చూపించి, క్వాలిటీ ఆమోదం పొందారు. కాగా, ఇప్పుడు కాంటాలు పెట్టి సరుకు వెనక్కి పంపుతుండటంతో రైతులు ఆందోళన చెందుతున్నారు.
మెషిన్ కోతలు కారణం
వరి పంట తరహాలో రైతులు సోయాబీన్ పంటను హార్వెస్టర్లతో కోయించారు. ఆకు పసరు సోయా గింజలకు అంటుకొని కలర్ తగ్గడంతో క్వాలిటీ లేదని కొన్ని రకాలను తిప్పిపంపుతున్నారు. కరిష్మా సీడ్ దిగుబడి ఇతర రకాలతో పోలిస్తే కొంచెం తక్కువగా ఉంటుంది. ఓంకార్ పరిస్థితి కాస్త అటూఇటుగా అంతే ఉంది. హార్వెస్టర్ వాడకంతో కంటికి కలర్ఫుల్గా కనబడక రిజెక్ట్ అవుతున్నాయి. అదే మిషన్లతో కోసిన కేడీఎస్, గ్రీన్గోల్డ్ రకం సోయా కలర్ బాగుండడంతో దిగుమతి చేసుకుంటున్నారు.
సింగిల్ విండోలకు లాస్
కమీషన్ ఆశతో సింగిల్ విండోలు కొనుగోలు సెంటర్లు నడుపుతుండగా, రైతులు కాంటాలు పెడుతున్నారు. లారీలు అన్లోడ్ అయితేనే రైతులకు బిల్లు, సంఘాలకు కమీషన్ అందుతుంది. అయితే లోడ్ చేసి పంపిన వాటిలో సుమారు 35 లారీల సరుకు బోధన్, కోటగిరి, సాలూరాలో రిజెక్ట్ కావడంతో హమాలీ, ట్రాన్స్పోర్ట్ భారం క్వింటాల్కు రూ.70 చొప్పున ఇప్పుడు సింగిల్ విండోలు మోయాల్సిన పరిస్థితి తలెత్తింది.
50 కిలోల చొప్పున పంపిన బ్యాగ్లు వారం తరువాత వాపస్ వచ్చే టైంకు నాలుగైదు కిలోలు తగ్గడంతో రైతులకు నష్టం వాటిల్లుతోంది. దానికి తోడు ప్రైవేట్ వ్యాపారులు రూ.4,100 కంటే చెల్లించమని చెప్పడంతో దిక్కుతోచని స్థితిలో ఉన్నారు. రైతులు సోమవారం కలెక్టర్ రాజీవ్గాంధీ హనుమంతును కలిసి తమ గోడు వెళ్లబోసుకున్నారు.
సైంటిఫిక్ రీజన్ లేదు: కేవలం కలర్లేదని కారణం చూపి కాంటాపెట్టి పంపిన సోయాబిన్ లారీలను వాపస్ చేస్తున్నారు. క్వాలిటీ చెక్ శాస్త్రీయంగా చేయడంలేదు. కమీషన్ కోసం సెంటర్లు నడిపి నష్టపోతున్నాం. రైతులు కూడా లాస్ అవుతున్నారు. గతంలో ఈ పరిస్థితి లేదు. కలెక్టర్ చొరవ చూపితేనే గట్టుక్కుతాం.రవి, సింగిల్ విండో చైర్మన్, మందర్నా
