- ఓటర్లతో అభ్యర్థుల ములాఖత్
- మారుతున్న బలాబలాలు
నాగర్ కర్నూల్, వెలుగు : లోకల్ బాడీస్ ఎమ్మెల్సీ ఎలక్షన్స్ కాక మొదలైంది. ఉమ్మడి జిల్లాలో నియోజకవర్గాలవారీగా జడ్పీటీసీ, ఎంపీటీసీలు, కౌన్సిలర్లు, ఎంపీ, ఎమ్మెల్యేలు, ఎమ్మెల్సీ ఓటర్ల లెక్క తేలింది. ఎమ్మెల్సీ ఉప ఎన్నికలో 1,439 మంది ఓటు వినియోగించుకోనున్నారు. 14 మంది ఎమ్మెల్యేలు, ముగ్గురు ఎమ్మెల్సీలు, ఇద్దరు ఎంపీలు ఎక్స్ అఫిషీయో హోదాలో ఓటు హక్కు వినియోగించుకుంటారు. ఉమ్మడి జిల్లాలో ఓటర్లను ఆకట్టుకోవడానికి కాంగ్రెస్, బీఆర్ఎస్ అభ్యర్థులు సర్వశక్తులు ఒడ్డుతున్నారు.
ఇప్పటికే పలు మున్సిపాలిటీలు, మండల పరిషత్లు కాంగ్రెస్ ఖాతాలోకి వెళ్లిపోయాయి. ఉమ్మడి జిల్లాలోని ఏదో ఒక నియోజకవర్గంలో ప్రతిరోజు ఎంపీటీసీలు, కౌన్సిలర్లు కాంగ్రెస్లో చేరుతున్నారు. ఓటమిని జీర్ణించుకోలేని బీఆర్ఎస్ లీడర్లు ముఖం చాటేస్తుంటే, కింది స్థాయిలో క్యాడర్ చెల్లాచెదురవుతోంది. ఉమ్మడి జిల్లాలో అసెంబ్లీ ఎలక్షన్స్కు ముందున్న వాతావరణం ఇప్పడు లేదు.
.14 మంది ఎమ్మెల్యేలు, ఇద్దరు ఎంపీలు, నలుగురు ఎమ్మెల్సీలు, జిల్లా పరిషత్, మండల పరిషత్, మెజార్టీ మున్సిపాలిటీలు బీఆర్ఎస్ చేతిలో ఉండేవి. అసెంబ్లీ రిజల్ట్స్ తర్వాత పరిస్థితి తారుమారైపోయింది. చేజారుతున్న మున్సిపల్ కౌన్సిల్స్, మండలాలను కాపాడుకోలేక మాజీ ఎమ్మెల్యేలు చేతులెత్తేశారు.
ఈ ఎన్నికలు మరీ స్పెషల్..
ఎమ్మెల్సీ బై ఎలక్షన్స్లో స్థానిక సంస్థల అభివృద్ది, నిధులు, బాధ్యతలు, హక్కులు ఇతర అంశాల కంటే పోయిన చోటే వెతుక్కోవాలన్న ఫిలాసఫీ ఎక్కువగా ప్రభావితం చేస్తోంది. గతంలో జరిగిన ఎమ్మెల్సీ ఎన్నికల్లో బలం లేకపోవడంతో కాంగ్రెస్ పార్టీ అభ్యర్థులను బరిలోకి దింపలేదు. దీంతో బీఆర్ఎస్ అభ్యర్థులు కసిరెడ్డి నారాయణ రెడ్డి, కూచుకుళ్ల దామోదర్రెడ్డి ఏకగ్రీవంగా ఎన్నికయ్యారు.
పోటీ లేకపోవడంతో పైసా ఖర్చు చేయాల్సిన అవసరం రాలేదు. ఇప్పుడు జరుగుతున్న బై ఎలక్షన్స్లో పోయినసారి జరిగిన నష్టాన్ని పూడ్చుకోవాలన్న ఆరాటంతో ఉన్న స్థానిక సంస్థల ప్రతినిధులు లీడర్లు చెప్పిన దానికి తలూపుతున్నా, ఓటింగ్ విషయానికి వచ్చేసరికి ఏం చేస్తారోననే ఆందోళన రెండు పార్టీల క్యాండిడేట్లలో ఉంది.
సీరియస్గా తీసుకుంటున్న కాంగ్రెస్..
ఎమ్మెల్సీ ఉప ఎన్నికను కాంగ్రెస్ పార్టీ నేతలు సీరియస్గా తీసుకుంటున్నారు. ఇప్పటికే కాంగ్రెస్ అభ్యర్థి మన్నె జీవన్ రెడ్డి రెండు సార్లు ఉమ్మడి జిల్లాలోని అన్ని నియోజకవర్గాల ఓటర్లను కలిశారు. మంత్రి జూపల్లి కృష్ణారావు ఎమ్మెల్సీ ఎన్నికల బాధ్యతను తీసుకున్నారు. నియోజకవర్గాల వారీగా మున్సిపల్ కౌన్సిలర్లు, ఎంపీటీసీలు, జడ్పీటీసీలను కలుస్తున్నారు. ఎమ్మెల్యేల అధ్యక్షతన మీటింగులు నిర్వహిస్తున్నారు.
బీఆర్ఎస్ అభ్యర్థి నవీన్రెడ్డికి మద్దతుగా మాజీ మంత్రులు, మాజీ ఎమ్మెల్యేలు మీటింగులు పెడుతున్నారు. ఫస్ట్ ప్రియారిటీ ఓటుతో బయటపడేందుకు రెండు పార్టీల నాయకులు ప్లాన్ చేస్తున్నారు. పోలింగ్ నాటికి పార్టీల బలాబలాలు మారే అవకాశం ఉంది. అవసరమైతే ఎంపీటీసీలు, జడ్పీటీసీలు, కౌన్సిలర్లను క్యాంప్లకు తరలించే యోచనలో కాంగ్రెస్ నేతలు ఉన్నారు.
అధికార పార్టీకి దగ్గరవుతున్రు..
బీఆర్ఎస్ రెండోసారి అధికారంలోకి వచ్చాక స్థానిక సంస్థల ప్రజాప్రతినిధులను ఉత్సవ విగ్రహాలుగా మార్చేశారు. అభివృద్ధి పనులు చేపట్టేందుకు నిధులు మంజూరు కాకపోవడం, చేయడానికి పనులు లేకపోవడంతో గ్రామాల్లో ఇబ్బందికర పరిస్థితిని ఎదుర్కొన్నారు. ఈ ఎన్నికలతో అధికార పార్టీకి దగ్గర కావడం ద్వారా రాజకీయ భవిష్యత్కు ఇబ్బంది ఉండదని ఎంపీటీసీలు, జడ్పీటీసీలు భావిస్తున్నారు.
ఇదే జరిగితే కాంగ్రెస్ అభ్యర్థి మన్నె జీవన్రెడ్డి ఫస్ట్ ప్రియారిటీ ఓట్లతో గెలుస్తారని రాజకీయ విశ్లేషకులు చెబుతున్నారు. ఇదిలాఉంటే ఒక వైపు ఎమ్మెల్సీ ఉప ఎన్నిక మరోవైపు పార్లమెంట్ ఎలక్షన్స్ బీఆర్ఎస్ నాయకత్వానికి ఊపిరాడకుండా చేస్తున్నాయి.
