- నడిగూడెం మండలం రామాపురం శివారులో గుర్తింపు
- బోర్డు పెట్టి వెళ్లిపోయిన ఆఫీసర్లు
నడిగూడెం (మునగాల), వెలుగు : నాగార్జునసాగర్ ప్రధాన ఎడమ కాల్వకు నడిగూడెం మండలం రామాపురం శివారులోని 120 కిలోమీటర్ల సమీపంలో బుంగ పడింది. రెండు రోజుల క్రితం తాగునీటి అవసరాల కోసం ఖమ్మం జిల్లా పాలేరు రిజర్వాయర్కు ప్రభుత్వం నీటిని విడుదల చేసింది. ప్రధాన ఎడమ కాల్వ నుంచి 5500 క్యూసెక్కుల విడుదల చేస్తుండగా మునగాల హెడ్ రెగ్యులేటర్ వద్దకు వచ్చేసరికి 3500 క్యూసెక్కులు పాలేరు రిజర్వాయర్కు పోతున్నాయి. ఈ క్రమంలో నీటి ప్రవాహ ఉధృతికి కాల్వకు120 కిలోమీటర్ల వద్ద కట్ట కోతకు గురై బుంగ పడింది.
మునగాల తహసీల్దార్ ఆంజనేయులు, ఎంపీడీవో రమేశ్ దీన్ దయాల్, నడిగూడెం ఎస్ఐ అజయ్ కుమార్ , ఎన్ఎస్పీ సిబ్బంది అక్కడికి చేరుకొని బుంగ పడిన ప్రదేశాన్ని పరిశీలించారు. టెంపరరీగా కంపవేసి రాకపోకలను నిషేధిస్తున్నట్టు బోర్డు పెట్టి వెళ్లిపోయారు. దీంతో నీటి ఉధృతికి మరింత కోతకు గురై ఏ ప్రమాదం జరుగుతుందోనని రైతులు ఆందోళన చెందుతున్నారు. గతంలో ఈ ప్రదేశంలోనే కాల్వ కట్ట కోతకు గురైందని, రిపేర్లు చేయించాలని స్థానికులు ఆఫీసర్లను కోరినా వారు పట్టించుకోలేదన్నారు.
