నకిరేకల్, వెలుగు : నకిరేకల్ ఎమ్మెల్యే వేముల వీరేశం సైబర్ ఉచ్చులో చిక్కుకున్నారు. సైబర్ నేరగాళ్లు ఎమ్మెల్యేకు న్యూడ్‌ వీడియో కాల్‌ చేసి, దాని రికార్డింగ్‌‌తో బ్లాక్‌‌మెయిల్‌‌కు దిగారు. వివరాల్లోకి వెళ్తే... ఎమ్మెల్యే వేముల వీరేశం మంగళవారం రాత్రి తన ఆఫీస్‌‌లో అనుచరులతో మాట్లాడుతుండగా గుర్తు తెలియని నంబర్‌ నుంచి వాట్సప్‌‌లో వీడియో కాల్‌ వచ్చింది.
ఎమ్మెల్యే ఫోన్‌ లిఫ్ట్‌ చేయగా అవతలివైపు ఓ అమ్మాయి నగ్నంగా కనిపించింది. దీంతో ఎమ్మెల్యే వెంటనే ఫోన్‌ కట్‌ చేశారు. అప్పటికే స్ర్కీన్‌ రికార్డు చేసిన సైబర్ నేరగాళ్లు ఆ వీడియోను ఎమ్మెల్యేకు పంపి డబ్బులు డిమాండ్‌ చేశారు. డబ్బలు ఇవ్వకపోతే వీడియోను కాంగ్రెస్‌ లీడర్లకు పంపడమే కాకుండా సోషల్‌ మీడియాలో వైరల్‌ చేస్తామని బెదిరించారు.
అయినా ఎమ్మెల్యే స్పందించకపోవడంతో సైబర్ నేరగాళ్లు వీడియో క్లిప్‌‌ను పలువురు కాంగ్రెస్‌ నేతలకు, కార్యకర్తలకు ఫార్వర్డ్‌ చేశారు. వీడియో చూసిన కొందరు విషయాన్ని ఎమ్మెల్యే వీరేశం దృష్టికి తీసుకురాగా ఆయన పోలీసులకు ఫిర్యాదు చేశారు. పోలీసుల సలహాతో ఎమ్మెల్యే సైబర్ నేరగాళ్ల నంబర్‌‌ను బ్లాక్‌ చేశారు. సైబర్ నేరగాళ్లు మధ్యప్రదేశ్‌ నుంచి కాల్‌ నుంచి చేసినట్లు పోలీసులు గుర్తించారు. సైబర్ క్రైమ్‌ చట్టం ప్రకారం కేసు నమోదు చేసి, ప్రత్యేక టీమ్‌‌తో దర్యాప్తు చేస్తున్నట్లు నకిరేకల్ సీఐ రాజశేఖర్‌ చెప్పారు.
