సికింద్రాబాద్, వెలుగు: బీఆర్ఎస్లీడర్, మాజీ ఎస్సీ, ఎస్టీ కమిషన్ చైర్మన్ డాక్టర్ ఎర్రోళ్ల శ్రీనివాస్ ను మాసబ్ట్యాంక్ పోలీసులు గురువారం వెస్ట్మారేడ్పల్లిలోని ఆయన ఇంట్లో అరెస్ట్ చేశారు. బంజారాహిల్స్ పీఎస్ లో తన విధులకు ఆటంకం కలిగించారని సీఐ రాఘవేంద్ర ఫిర్యాదు చేయడంతో హుజురాబాద్ ఎమ్మెల్యే పాడి కౌశిక్ రెడ్డితో పాటు ఎర్రోళ్ల శ్రీనివాస్పై కేసు నమోదైంది. ఇప్పటికే కౌశిక్రెడ్డిని అరెస్ట్ చేయగా కోర్టు బెయిల్మంజూరు చేసింది.
రెండు సార్లు నోటీసులు అందుకున్నప్పటికీ ఎర్రోళ్ల శ్రీనివాస్ విచారణకు హాజరుకాకపోవడంతో గురువారం తెల్లవారుజామున వెస్ట్మారేడ్పల్లిలోని ఆయన ఇంటికి పోలీసులు వెళ్లారు. పోలీసులను చూసిన ఎర్రోళ్ల డోర్క్లోజ్చేశారు. ఎంత పిలిచినా తీయలేదు. మరోవైపు అరెస్ట్ చేస్తున్నారన్న విషయం తెలుసుకున్న బీఆర్ఎస్శ్రేణులు పెద్ద సంఖ్యలో ఎర్రోళ్ల ఇంటికి వచ్చి ఆందోళనకు దిగారు.
పోలీస్వాహనాన్ని అడ్డుకున్నారు. ఎంత సర్ది చెప్పినా వినకపోవడంతో వాహనానికి అడ్డువచ్చిన బీఆర్ఎస్కార్యకర్తలను పక్కకు లాగేసి ఎర్రోళ్లను అరెస్ట్చేసి వ్యాన్ లో మాసబ్ట్యాంక్ పీఎస్కు తరలించారు. చింతల బస్తీలోని సెంటర్లో కొవిడ్టెస్ట్, ఉస్మానియాలో ఇతర వైద్య పరీక్షలు నిర్వహించారు. తర్వాత నాంపల్లి పీఎస్కు తరలించగా మాజీ మంత్రులు హరీశ్ రావు, ఎర్రబెల్లి దయాకర్ రావు, ఎమ్మెల్యేలు కాలేరు వెంకటేశ్, వివేకానంద్ ఎర్రోళ్లను కలుసుకున్నారు. తర్వాత నాంపల్లి కోర్టులో హాజరు పరచగా కోర్టు రూ.5 వేల పూచీకత్తు, ఇద్దరు ష్యూరిటీలతో బెయిల్మంజూరు చేసింది. పోలీసుల విచారణకు సహకరించాలని ఆదేశించింది.
