హైదరాబాద్, వెలుగు: బంజారాహిల్స్లోని హరేకృష్ణ స్వర్ణ దేవాలయంలో బుధవారం శ్రీలక్ష్మీనరసింహస్వామి జయంతి వేడుకలు ఘనంగా జరిగాయి. తెల్లవారుజామున 5.10 గంటలకు అర్చకులు ఉత్సవ మూర్తులకు 108 కలశాలతో మహా అభిషేకం చేశారు. పంచామృతాలు, పంచగవ్యము, పండ్ల రసాలు, పుష్పాలు, నవరత్నములను సమర్పించారు. అనంతరం వేద మంత్రోచ్చరణ నడుము నరసింహ హోమం, మహా పూర్ణాహుతి నిర్వహించారు. తర్వాత సంప్రదాయబద్ధంగా స్వామివారి కల్యాణం జరిపించారు. హరే కృష్ణ మూవ్‌‌మెంట్ హైదరాబాద్ అధ్యక్షుడు సత్యగౌర చంద్రదాస ప్రభుజీ పాల్గొని ప్రత్యేక ప్రవచనం చేశారు. కల్యాణం అనంతరం భక్తులకు ప్రసాదం పంపిణీ చేశారు. ఉత్సవాల్లో భాగంగా ఉదయం నుంచి రాత్రి వరకు భక్తులకు స్వయంభూ శ్రీలక్ష్మీనరసింహస్వామి దర్శనంతోపాటు, స్వామివారి ఊంజల సేవలో పాల్గొనే అవకాశం కల్పించారు.
