నారాయణపేట జిల్లా మాగనూర్ ప్రభుత్వ హైస్కూల్లో 2024, నవంబర్ 20న ఫుడ్ పాయిజన్ జరిగిన విషయం తెలిసిందే. మధ్యాహ్న భోజనం వికటించి దాదాపు 50 మంది విద్యార్థులు అస్వస్థతకు గురయ్యారు. ఈ ఘటనపై ఆగ్రహం వ్యక్తం చేసిన సీఎం రేవంత్ రెడ్డి.. సమగ్ర నివేదిక ఇవ్వాలని జిల్లా కలెక్టర్ను ఆదేశించారు. ఓ వైపు ఈ ఘటనలో విచారణ జరుగుతుండగానే ఇవాళ (నవంబర్ 21) కూడా అదే మాగనూర్ హైస్కూల్లో విద్యార్థులకు పెట్టే మధ్యాహ్న భోజనంలో పురుగులు ప్రత్యక్షమయ్యాయి. దీంతో ఈ ఘటనపై తీవ్ర ఆగ్రహం వ్యక్తం ప్రభుత్వం చర్యలకు పూనుకుంది.
ఈ మేరకు నారాయణపేట డీఈవో అబ్దుల్ ఘనీని ప్రభుత్వం సస్పెండ్ చేసింది. అలాగే ఆర్డీవో రాంచందర్, ఎంపీడీఓ రహ్మతుదిన్, ఫుడ్ ఇన్స్పెక్టర్ నీలిమకు షోకాజ్ నోటీసులు జారీ చేసినట్లు అడిషనల్ కలెక్టర్ బెన్ శాలోమ్ తెలిపారు. భోజనం చేసే ఏజెన్సీ కాంట్రాక్ట్ను కూడా రద్దు చేశారు. కలుషిత ఆహారం తిని 50 మంది విద్యార్థులు అస్వస్థతకు గురి అయినప్పటికీ.. ఇవాళ కూడా మధ్యాహ్న భోజనంలో పురుగులు రావడంతో విద్యార్థుల తల్లిదండ్రులు పాఠశాల ముందు ఆందోళకు దిగారు.
