- భద్రాచలంలో హైదరాబాద్ నార్కోటిక్స్ పోలీసుల తనిఖీలు
- 81.950 కిలోల గంజాయి స్వాధీనం.. ముగ్గురు అరెస్ట్
భద్రాచలం, వెలుగు: కారులో గంజాయి తీసుకెళ్తూ ఇద్దరు రిపోర్టర్లు పట్టుబడిన ఘటన భద్రాద్రి కొత్తగూడెం జిల్లాలో జరిగింది. హైదరాబాద్ నార్కోటిక్స్ డిపార్ట్ మెంట్ పోలీసులు గురువారం భద్రాచలం గోదావరి బ్రిడ్జి చెక్ పోస్టు వద్ద వాహనాల తనిఖీలు చేపట్టారు. కారులో ముగ్గురు వ్యక్తులు వెళ్తుండగా ఆపి చెక్ చేశారు. బూర్గంపాడు మండలం సోంపల్లికి చెందిన ఇద్దరు రిపోర్టర్లు పండగ రాములు, పండగ వెంకటేశ్వర్లు వద్ద 81.950 కిలోల గంజాయి దొరికింది.
వీరు చత్తీస్ గడ్ సుక్మా జిల్లా కుంట తాలూకా మర్లగూడ గ్రామానికి చెందిన మడవి నంద అనే వ్యక్తితో కలిసి గంజాయిని తీసుకొస్తున్నారు. పట్టుబడిన గంజాయి విలువ రూ.20.25లక్షలు ఉంటుందని నార్కోటిక్స్ పోలీసులు తెలిపారు. ముగ్గురు నిందితులతో పాటు గంజాయిని, కారును భద్రాచలం టౌన్స్టేషన్కు తరలించారు.
