బాలివుడ్ నటి నర్గీస్ సోదరి అలియా ఫక్రీ అరెస్ట్
అదుపులోకి తీసుకున్న న్యూయార్క్ పోలీసులు
న్యూయార్క్: బాలివుడ్ నటి నర్గీస్ ఫక్రీ సోదరి అలియా ఫక్రీ అమెరికాలో అరెస్టయ్యారు. జంట హత్య కేసులో ఆమె ప్రధాన నిందితురాలిగా ఉన్నారు. తన మాజీ బాయ్ఫ్రెండ్, అతని స్నేహితురాలు కలిసి ఉండగా అలియా వారిని సజీవ దహనం చేసినట్లు ఆరోపణలున్నాయి. కొద్దిరోజుల కింద జరిగిన ఈ ఘటనలో అలియాను ప్రధాన ముద్దాయిగా పోలీసులు నిర్ధారించారు. న్యూయార్క్లో ఉంటున్న అలియా ఫక్రీ కొంతకాలంపాటు ఎడ్వర్డ్ జాకోబ్ అనే యువకుడితో రిలేషన్షిప్లో ఉన్నారు. ఇద్దరి మధ్య మనస్పర్థలు రావడంతో ఏడాది కిందే విడిపోయారు.
ఆపై జాకోబ్ మరో యువతి ఎటినీతో రిలేషన్షిప్ మొదలు పెట్టాడని తెలియడంతో అలియా పలుమార్లు అతడిపై బెదిరింపులకు పాల్పడ్డారు. అదే క్రమంలో గత నెల నవంబర్ 2న జాకోబ్, అతడి స్నేహితురాలు ఎటినీ ఉంటున్న గ్యారేజీ వద్దకు వెళ్లి ఆ ఇంటికి నిప్పంటించారు. దీంతో ఇద్దరూ మంటల్లో చిక్కుకుని చనిపోయారు. ప్రత్యక్ష సాక్షుల వాంగ్మూలం ఆధారంగా అలియా ఫక్రీని పోలీసులు మంగళవారం అరెస్ట్ చేశారు. ఈ కేసులో ఆమె దోషిగా తేలితే జీవిత ఖైదు పడే అవకాశముంది. కేసు విచారణ ఈ నెల 9న జరగనుంది.
