- 148 టీఎంసీల్లో సగం ఇవ్వాల్సిందేనంటున్న మన అధికారులు
- ఇప్పటికే ఎన్‌డబ్ల్యూడీఏకి రిప్లై ఇస్తూ లేఖ
హైదరాబాద్, వెలుగు: నదుల అనుసంధానంపై నేషనల్ వాటర్ డెవలప్‌మెంట్ అథారిటీ (ఎండబ్ల్యూడీఏ) మరోమారు సమావేశం నిర్వహించనుంది. వచ్చే నెల 3న ఢిల్లీలో హైబ్రిడ్ మోడ్‌లో ఈ సమావేశాన్ని నిర్వహించనుంది. గోదావరి కావేరి లింక్‌తోపాటు దేశంలో చేపట్టిన వివిధ అనుసంధాన ప్రాజెక్టులు, వివిధ రాష్ట్రాల్లో చేపట్టిన ఇంట్రా లింక్ ప్రాజెక్టులపై ఆయా రాష్ట్రాలతో చర్చించనుంది. గోదావరి–కావేరి లింక్‌కు సంబంధించి డిసెంబర్లోపు తెలంగాణ, చత్తీస్‌గఢ్ల మధ్య ఒప్పందాన్ని ఫైనల్ చేయించాలని ఎన్‌డబ్ల్యూడీఏ ప్రయత్నాలు చేస్తున్నది.
ఈ లింక్ ప్రాజెక్ట్‌కు సంబంధించి ఇచ్చంపల్లి- –సాగర్ కనెక్షన్కు ఓ డీపీఆర్, నాగార్జునసాగర్-– పెన్నా (సోమశిల) కనెక్టివిటీకి మరో డీపీఆర్, పెన్నా-–కావేరి కనెక్టివిటీకి ఇంకో డీపీఆర్ సహా మొత్తం మూడు డీపీఆర్‌లను 2021లోనే పూర్తి చేసి ఆమోదించగా.. నీటి వాటాలు, బ్యారేజీ ఎత్తుపై తెలంగాణ అభ్యంతరం వ్యక్తం చేస్తున్నది.
బ్యారేజీ ఎత్తును 83 నుంచి 87 మీటర్ల వరకు తెలంగాణ ప్రతిపాదిస్తుండగా చత్తీస్‌గఢ్ ఒప్పుకోవట్లేదు. ప్రాజెక్ట్ ద్వారా తరలించాలనుకుంటున్న 148 టీఎంసీల నీటిలో సగం వాటా ఇవ్వాలని మన రాష్ట్రం పట్టుబడుతున్నా.. 33 శాతానికి ఒప్పుకోవాలని ఎన్‌డబ్ల్యూడీఏ చెప్తున్నది. అయితే ఆ ప్రతిపాదనలకు ఒప్పుకొనే ప్రసక్తే లేదని, ఇప్పటికే ఎన్‌డబ్ల్యూడీఏకి లేఖ కూడా రాశామని అధికారులు చెబుతున్నారు.
