మేడిగడ్డ పిల్లర్ల వద్ద ఎన్‌‌డీఎస్‌‌ఏ టెస్టులు

• కుంగిన చోట 25 మీటర్ల లోతు తవ్వి పరీక్షలు
• ఢిల్లీ నుంచి వచ్చిన నిపుణుల బృందం.. వారం రోజుల పాటు కొనసాగనున్న టెస్టులు

జయశంకర్‌‌ భూపాలపల్లి / మహాదేవ్‌‌పూర్‌‌, వెలుగు: నేషనల్‌‌ డ్యామ్‌‌ సేఫ్టీ అథారిటీ (ఎన్‌‌డీఎస్‌‌ఏ) సూచనలు, రాష్ట్ర ప్రభుత్వ ఆదేశాల మేరకు మేడిగడ్డ బ్యారేజీ పిల్లర్ల వద్ద సెంట్రల్ సాయిల్ మెటీరియల్ రీసెర్చ్ స్టేషన్ (సీఎస్​ఎంఆర్ఎస్) నిపుణుల బృందం బుధవారం టెస్ట్​లు ప్రారంభించింది. వారం రోజుల పాటు ఈ పరీక్షలు నిర్వహించి మేడిగడ్డ బ్యారేజీ పిల్లర్లు కుంగడానికి గల కారణాలను తెలుసుకోనున్నది. ఫ్యూచర్​లో బ్యారేజీ పనికొస్తుందా? లేదా? తేలేది ఈ పరీక్షలతోనే అని నిపుణులు చెప్తున్నరు. భూపాలపల్లి జిల్లా మహదేవపూర్ మండలం కాళేశ్వరం ప్రాజెక్టులోని మేడిగడ్డ బ్యారేజ్ గతేడాది అక్టోబర్‌‌ 21న భూమిలోకి కుంగింది. 

బ్యారేజీని పరిశీలించిన ఎన్​డీఎస్​ఏ ఆఫీసర్లు.. కుంగడానికి గల కారణాలు తెలుసుకోవడానికి ఎలాంటి పరీక్షలు చేయాలో ఇటీవల ప్రభుత్వానికి అందజేసిన నివేదికలో సూచించింది. బ్యారేజీ దిగువన భూమి లోపల ఎలా ఉందో తెలుసుకునేందుకు ఢిల్లీకి చెందిన సీఎస్ఎంఆర్ఎస్ సంస్థతో పరీక్షలు చేయించాల్సిందిగా తెలిపింది. ఈ నివేదిక ప్రకారం భవిష్యత్‌‌లో చేపట్టాల్సిన చర్యల గురించి వివరిస్తామని తెలిపింది. ఎన్‌‌డీఎస్‌‌ఏ సూచనల మేరకు రాష్ట్ర ప్రభుత్వం ఆ సంస్థను సంప్రదించి, టెస్ట్‌‌లకు అవసరమైన రూ.2 కోట్లకు పైగా ఫీజును చెల్లించింది. 

దీంతో సీఎస్ఎంఆర్ఎస్ సంస్థ ప్రతినిధి హరిదేవ్ తో పాటు ఆరుగురు సభ్యుల బృందం బుధవారం మేడిగడ్డ బ్యారేజీకి చేరుకున్నది. స్పెషల్ ఎక్విప్​మెంట్​లతో మేడిగడ్డ బ్యారేజీ నిర్మాణంలో ఉపయోగించిన మెటీరియల్, మట్టి నమూనాలను సేకరిస్తున్నది. బ్యారేజీలో కుంగిన 7వ బ్లాక్‌‌లోని పిల్లర్ల వద్ద టెస్టులు ప్రారంభించింది. 

ఏడో బ్లాక్​లోని అన్ని పిల్లర్ల వద్ద ఈ టెస్టులు చేయనున్నది. దీనికోసం పిల్లర్ల మధ్య 25 మీటర్ల లోతు నుంచి ఇసుక నమూనాలను సేకరిస్తున్నది. బుధవారం 12వ పిల్లర్ వద్ద 10 ఫీట్ల మేర బృందం సభ్యులు తవ్వారు. 13వ పిల్లర్ వద్ద పని పూర్తిచేసి మొదటి శాంపిల్ తీసుకున్నారు. ఈ బృందం వారం రోజుల పాటు ఇక్కడే ఉండి బ్యారేజీ మొత్తం పరిశీలించి రిపోర్ట్‌‌ ఇస్తుందని ఇరిగేషన్‌‌ ఇంజినీర్లు తెలిపారు.