- జాతీయ జెండా పట్టుకున్న మావోయిస్టు అగ్రనేత హిడ్మా తల్లి
భద్రాచలం, వెలుగు : ఛత్తీస్గఢ్ రాష్ట్రంలోని మావోయిస్టుల కంచుకోటగా పేర్కొనే దండకారణ్యంలో 76వ రిపబ్లిక్ డే సందర్భంగా ఆదివారం త్రివర్ణ పతాకం రెపరెపలాడింది. మావోయిస్టులు ఈ ప్రాంతంలో వేడుకలను నిరసిస్తూ నల్లజెండాలతో ర్యాలీని నిర్వహించే వారు. కానీ, ఈసారి ఆదివాసీలతో సీఆర్పీఎఫ్ జవాన్లు వేడుకలు ఘనంగా నిర్వహించారు.
గిరిజన పిల్లలతో జాతీయ జెండాలు పట్టించి గ్రామాల్లో ర్యాలీలు చేపట్టారు. మావోయిస్టు అగ్రనేత, కేంద్ర కమిటీ సభ్యుడు మడివి హిడ్మా తల్లి కూడా బీజాపూర్ జిల్లా కొండపల్లి బేస్ క్యాంపు వద్ద జాతీయ జెండా పట్టుకొని వేడుకల్లో పాల్గొనడం విశేషం. ఆదివాసీలకు అన్నదానం చేశారు. వైద్య పరీక్షలు నిర్వహించి మందులు ఉచితంగా పంపిణీ చేశారు. బట్టలు అందజేశారు. జవాన్లు సైతం అబూజ్మాఢ్ పర్వత ప్రాంతాల్లో జాతీయ జెండాలను ఎగురవేసి అభివాదం చేశారు. భారత్ మాతాకీ జై అంటూ నినాదాలతో దండకారణ్యం మారుమోగింది. అలాగే తెలంగాణ బార్డర్లోని చర్ల మండలం సమీపంలో ఉన్న ఛత్తీస్గఢ్ రాష్ట్రం బీజాపూర్ జిల్లా పామేడు నుంచి జిల్లా కేంద్రానికి బస్సు సర్వీసును ప్రారంభించారు. మారుమూల గ్రామాలను కలుపుకుంటూ ఈ బస్సు బీజాపూర్కు చేరుకుంటుంది.
