నల్గొండ అర్బన్, వెలుగు : మర్డర్ కేసులో తొమ్మిది మందిని అరెస్టు చేసినట్లు నల్గొండ ఎస్పీ కె.అపూర్వరావు తెలిపారు. కేసు వివరాలను సోమవారం పోలీస్ జిల్లా కార్యాలయంలో ఆమె మీడియాకు వెల్లడించారు. త్రిపూరారం మండలం జి. అన్నారం గ్రామానికి చెందిన ఇరిగి నవీన్ నాలుగేండ్లుగా అదే గ్రామానికి చెందిన మైనర్ అమ్మాయిని ప్రేమిస్తున్నానంటూ వెంటపడుతున్నాడు. దీంతో బాలిక తరపువారు నవీన్ను హెచ్చరించారు. ఈ క్రమంలో ఈ ఏడాది మార్చి 20న అతడు పురుగుల మందు తాగి ఆత్మహత్యాయత్నం చేశారు. చికిత్స అనంతరం మళ్లీ బాలికను ప్రేమ పేరుతో వేధిస్తున్నాడు. దీంతో అమ్మాయి తమ్ముడు మణిదీప్, అతడి స్నేహితుడు శివప్రసాద్ కలిసి నవీన్ తీరు మార్చుకోవాలని, అమ్మాయి వెంట పడితే చంపేస్తామని బెదిరించారు.
ఈ విషయాన్ని నవీన్ తన స్నేహితుడైన ఈట అనిల్ కుమార్ కు తెలిపాడు. దీనిపై మాట్లాడేందుకు ఇద్దరూ కలిసి ఈనెల 9న మధ్యాహ్నం మరో ఫ్రెండ్ అయిన త్రిపురారం మండలం గుంటిపల్లి గ్రామంలోని తిరుమల్ ఇంటికి వెళ్లారు. బెదిరింపుల విషయమై మాట్లాడుకునేందుకు తిరుమల్ఇంటికి రావాలని మణిదీప్, శివప్రసాద్ ను ఫోన్ ద్వారా అనిల్ కోరాడు. దీంతో మణిదీప్, శివప్రసాద్తమ తరఫు వారితో కలిసి నవీన్ను చంపాలని పథకం వేశారు. వెంటనే అందరూ కలిసి తిరుమల్ఇంటికి వెళ్లారు. ఒక్కసారిగా అక్కడున్న ముగ్గురిపై దాడి చేయగా అనిల్, తిరుమల్ తప్పించుకున్నారు. నవీన్ కూడా పారిపోతుండగా మణిదీప్తరఫువారు కర్రలు, కత్తితో వెంటాడి పొడిచి చంపేశారు. పోలీసులు విచారణ చేపట్టి తొమ్మిది మంది నిందితులను పట్టుకున్నారు. ఈ కేసులో త్రిపురారం మండలానికి చెందిన ఏ1 రామలింగం, రాజు, శివ ప్రసాద్, రాజేశ్, మణితేజ, కోటయ్య సురేశ్అలియాస్రాముతో పాటు ఇద్దరు మైనర్లు ఉన్నారు. వీరందరినీ రిమాండ్ కు తరలించారు. కేసును ఎస్పీ అపూర్వరావు పర్యవేక్షణలో మిర్యాలగూడ డీఎస్పీ పి. వెంకటగిరి, హాలియా సీఐ గాంధీ నాయక్, నిడమనూరు ఎస్సైశోభన్ బాబు, త్రిపురారం ఎస్సై జి.శోభన్ బాబు సిబ్బందితో కలిసి ఛేదించారు.
