ఏదైనా కేఫ్ లేదా రెస్టారెంట్కి వెళ్తే .. అక్కడి యాంబియెన్స్, ఫేమస్ ఫుడ్ లేదా స్పెషల్ సర్వీస్ల గురించి మాట్లాడుకుంటారు ఎవరైనా. కానీ, ముంబైలోని ‘బంబయ్ నజరియా’ కేఫ్లో అడుగు పెడితే మాత్రం కేవలం ఆ కేఫ్ గురించే మాట్లాడుకుంటారు. ఎందుకలా అంటే? ఫర్ ఏ ఛేంజ్ అంటూ ఓ కొత్త ఆలోచనతో జనాల ముందుకొచ్చింది ఈ కేఫ్. సొసైటీలో ట్రాన్స్జెండర్స్పై ఉన్న అభిప్రాయాల్ని మార్చడానికి వాళ్లకి మాత్రమే ఎంప్లాయిమెంట్ కల్పిస్తున్నారు ఇక్కడ. ‘నజరియా బద్లో నజారా బద్లేంగా’ అంటూ అందర్నీ ఆలోచింపజేస్తున్న ఈ కేఫ్ ఇప్పుడు టాక్ ఆఫ్ ది ఇంటర్నెట్ అయింది.
కాలం ఎంత ముందుకెళ్తున్నా.. ఎన్ని రకాలుగా అవేర్నెస్ కల్పించినా... ట్రాన్స్జెండర్స్పై ఉన్న అభిప్రాయాన్ని మార్చుకోవట్లేదు జనాలు. సొసైటీలో గుర్తింపు కోసం..అందరితో సమానంగా అవకాశాల కోసం ఇప్పటికీ పోరాడుతూనే ఉన్నారు వాళ్లు. అందుకే సొసైటీకి, ట్రాన్స్జెండర్స్కి మధ్యనున్న గ్యాప్కి ఓ బ్రిడ్జ్లా వచ్చింది ఈ బంబయ్నజరియా కేఫ్. ఇందులో పనిచేసేవాళ్లంతా.. వెయిటర్స్, స్వీపర్స్, చెఫ్లు కిచెన్ నుంచి సర్వీసెస్ వరకు అన్నింట్లో ట్రాన్స్ జెండర్సే ఉంటారు. టేస్టీ పావ్ బాజీ, కీమా, మసాలా పావ్, కాశ్మీరి పింక్ చాయ్లు అందిస్తారు. అన్నట్టు ఈ కేఫ్ ముంబై అంధేరి వెస్ట్లోని వెర్సోవాలో ఉంది. ‘నజరియా బద్లో... నజారా బద్లేంగా’ అనే ట్యాగ్లైన్ కూడా యాడ్ చేశారు ఈ కేఫ్ నేమ్ బోర్డ్ కింద. అది కాస్త ఫేమస్ ఫుడ్ బ్లాగింగ్ అకౌంట్‘ ఫుడ్డీ టేల్స్’ దృష్టిలో పడటంతో వీడియో తీసి సోషల్ మీడియాలో పోస్ట్ చేశారు. ఆ వీడియోకి వేలల్లో లైక్స్ వచ్చాయి. చాలామంది ఈ కేఫ్కి వెళ్లి తీరాల్సిందే అని కామెంట్లు కూడా పెడుతున్నారు. అలాగే ఇంత మంచి ఆలోచన చేసిన ఈ కేఫ్ ఫౌండర్స్ని మెచ్చుకుంటున్నారు.
యాంబియెన్స్ మరో అట్రాక్షన్
ఈ కేఫ్కి మరో స్పెషల్ అట్రాక్షన్ యాంబియెన్స్. కస్టమర్స్కి హోమ్లీ ఫీలింగ్ ఇవ్వడానికి అచ్చు ఇంటిలానే ఈ కేఫ్ని డిజైన్ చేశారు నిర్వాహకులు. హ్యాంగింగ్ లైట్స్.. చెక్క కుర్చీలు, బల్లలతో వింటేజ్ లుక్ తెచ్చారు కేఫ్కి. ఇండోర్ ప్లాంట్స్ గురించి ప్రత్యేకంగా చెప్పుకోవా ల్సిందే. రెట్రో స్టైల్ అద్దాలు, రేడియోలు, మెషిన్లు కూడా చూడొచ్చు ఈ కేఫ్లో. ఒకప్పటి బ్లాక్ అండ్ వైట్ టీవీలు కూడా కనిపిస్తాయి. జీవితం విలువని చెప్పే పెయింటింగ్స్ కూడా ఉన్నాయి. అన్నింటికన్నా ముఖ్యంగా కేఫ్లో అక్కడక్కడా బ్లాక్ బోర్డులు ఉంటాయి. వాటిపై కూడా ‘‘నజరియా బద్లో... నజారా బద్లేంగా’’ అని రాసి ఉంటుంది. ఫుడ్ విషయంలోనూ మంచి మార్కులే పడుతున్నాయి ఈ కేఫ్కి. ముంబై ఫేమస్ డిష్లతో పాటు మరెన్నో స్పెషల్స్ని ట్రాన్స్జెండర్స్ నవ్వుతూ వడ్డిస్తున్నారు.
‘‘మా నాన్నకి ట్రాన్స్జెండర్ కమ్యూనిటీ కోసం ఏదైనా చేయాలని తన చిన్నప్పట్నించీ ఉండేది. దాంతో ఆయన కలని నిజం చేయడానికి ఏడేండ్ల కిందట ఈ ఆలోచన చేశా. ఆ ఆలోచననే రెండు నెలల కిందట నా భర్తతో కలిసి ఆచరణలోకి తీసుకొచ్చా. కస్టమర్స్కి ఓల్డ్ ముంబై ఫీలింగ్ కలిగించడానికి బంబయ్ అని.. ట్రాన్స్జెండర్స్ని చూసే విధానంలో మార్పు రావాలన్న ఉద్దేశంతో నజరియా అని రెండింటిని కలిపి కేఫ్కి పేరు పెట్టా. ట్రాన్స్జెండర్స్ గురించి జనాలు మరింత తెలుసుకోవడానికి.. వాళ్లకి సమానంగా అవకాశాలు కల్పించడానికి ఈ కేఫ్ మంచి ప్లాట్ఫాంగా మారింది. చాలామంది మా ఆలోచనని గౌరవిస్తున్నారు.. ట్రాన్స్జెండర్స్తో ప్రేమగా మాట్లాడుతున్నారు అంటోంది ఫౌండర్స్లో ఒకరైన మిరండా. ఈ విషయంలో కేఫ్లో పనిచేస్తున్న ట్రాన్స్జెండర్స్ కూడా ఫుల్ ఖుష్గా ఉన్నారు.
