వాషింగ్టన్: మనం ఎంత ఫుడ్ తినాలి..? తినడం ఎప్పుడు ఆపేయాలి..? అన్నదానిని మెదడులోని రెండు కెమికల్స్ డిసైడ్ చేస్తాయట. డోపమైన్, గాబా అనే ఈ రెండు కెమికల్స్ కలిసి సెరెటోనిన్ హార్మోన్ లెవల్స్ను నియంత్రించడం ద్వారా ఆకలి, తిండి పరిమాణాన్ని కంట్రోల్ చేస్తాయని ఈ మేరకు అమెరికాలోని బేలర్ కాలేజ్ ఆఫ్ మెడిసిన్ సైంటిస్టుల స్టడీలో వెల్లడైంది. జంతువులపై జరిపిన స్టడీలో తాము ఈ విషయం కనుగొన్నామని, ఒబెసిటీ నివారణకు మెరుగైన మందులను తయారు చేసేందుకు తమ పరిశోధన ఫలితాలు ఉపయోగపడతాయని బేలర్ కాలేజ్ ప్రొఫెసర్ యాంగ్ షూ వెల్లడించారు.
మెదడులో ఉత్పత్తి అయ్యే డోపమైన్ మనుషుల్లో ఉద్రేకాన్ని కలిగిస్తుంటుంది. గాబా (గామా అమైనోబ్యుటారిక్ యాసిడ్) ఆ ఉద్రేకాన్ని తగ్గిస్తుంటుంది. కానీ ఈ రెండూ ఒకేసారి ఉత్పత్తి అయితే.. మూడ్ను స్థిరంగా ఉంచుతూ, ప్రశాంతంగా ఉండేందుకు దోహదం చేసే సెరెటోనిన్ ఉత్పత్తిని ప్రభావితం చేస్తాయని సైంటిస్టులు కనుగొన్నారు. ‘‘జంతువులకు ఆకలి వేసినప్పుడు వాటి మెదడులో సెరెటోనిన్ను ఉత్పత్తి చేసే న్యూరాన్లను గాబా, డోపమైన్ అణచివేస్తాయి. దీంతో మెదడులో సెరెటోనిన్ లెవల్స్ తగ్గి, ఆహారం తీసుకోవాలన్న కాంక్ష మొదలవుతుంది. తగినంత ఆహారం తీసుకోగానే, సెరెటోనిన్ ఉత్పత్తి పెరిగి తినడం ఆపేయాలన్న సంకేతాలు వెళ్తాయని గుర్తించాం” అని యాంగ్ తెలిపారు.
