టీవీ చానెళ్లలో ప్రసారమయ్యే వార్తల విషయంలో సొంతగా నియంత్రణ పాటిస్తూ, దాని పర్యవేక్షణ కోసం కొత్త సంస్థను ఏర్పాటు చేయనున్నట్లు న్యూస్ బ్రాడ్కాస్టర్స్ ఫెడరేషన్(ఎన్బీఎఫ్) తెలిపింది. కొత్తగా ఏర్పడబోయే సంస్థను ‘న్యూస్ బ్రాడ్కాస్టర్స్ ఫెడరేషన్ అథారిటీ(ఎన్బీఎఫ్ఏ)’ అనే పేరుతో, కొత్త ప్రమాణాలతో రూపొందించాలని నిర్ణయించింది. తొలిసారిగా 30కిపైగా నేషనల్, రీజనల్ న్యూస్ చానెళ్ల ప్రతినిధులు ఈమధ్యే ముంబైలో సమావేశమై ఈ మేరకు తీర్మానాలు చేశారు. న్యూస్ ఇండస్ట్రీలో కంటెట్ నియంత్రణ, సంస్థల నిర్వహణలో సమస్యలపైనా సమావేశంలో చర్చించారు. న్యూస్ కంటెంట్ నియంత్రణపై గతంలో కేంద్ర ప్రభుత్వం గైడ్లైన్లు రూపొందించిన నేపథ్యంలో ఎన్బీఎఫ్ నిర్ణయానికి ప్రాధాన్యత ఏర్పడింది. మీటింగ్కు హాజరైనవారిలో రిపబ్లిక్ మీడియా సంస్థల చీఫ్ అర్నబ్ గోస్వామి, చెన్నైకి చెందిన ఫోర్త్ డైమెన్షన్ మీడియా సొల్యూషన్స్ సీఈవో బి.శంకర్తదితురులున్నారు. వీ6 న్యూస్తోపాటు పలు తెలుగు న్యూస్ చానెళ్లూ ఎన్బీఎఫ్లో మెంబర్లుగా ఉన్నాయి.
ఫెడరేషన్లో ఇంకొన్ని టీవీ చానెళ్లు, బ్రాడ్కాస్టర్లు చేరేలా ఈనెల మొదటి నుంచి మెంబర్షిప్ డ్రైవ్ చేపడుతున్నట్లు, ఫెడరేషన్ హెడ్క్వార్టర్స్ను ఢిల్లీలో ఏర్పాటుచేయనున్నట్లు ఎన్బీఎఫ్ ప్రకటించింది. 50కిపైగా నేషనల్, రీజనరల్ చానెళ్ల ప్రతినిధులతో ఈ ఏడాది జులైలో ఎన్బీఎఫ్ ఏర్పడ్డ సంగతి తెలిసిందే.
ఎన్బీఎఫ్ఏ స్ట్రక్చర్ ఇలా..
వార్తల ప్రసారంలో ఉన్నత ప్రమాణాలు పాటించేలా చూడటం ఎన్బీఎఫ్ ముఖ్య ఉద్దేశం.కొత్త అథారిటీలో ఒక చైర్మన్, నలుగురు ఎడిటర్లు, ప్రముఖులుగా పేరుపొందిన నలుగురు ఇండిపెండెంట్లు ఉంటారు.
ఫెడరేషన్లోని అన్ని సంస్థలు రూల్స్ని సరిగా పాటించేలా, ఉల్లంఘనలు జరుగకుండా అథారిటీ చూసుకుంటుంది.దేశంలో, విదేశాల్లో వార్తలు ఎక్కువ మందికి చేరేలా వీక్షకుల సంఖ్యను పెంచుకోడానికి ఎన్బీఎఫ్ఏలో అంతర్భాగంగా డిస్ట్రిబ్యూషన్ కమిటీ ఏర్పాటుచేస్తారు. ఆర్థిక కమిటీ ద్వారా సభ్య సంస్థలు.. కొత్త టెక్నాలజీ, లిక్విడిటీని మరింత బలోపేతం చేసుకునేలా సహాయపడతారు. అవసరాలకు అనుగుణంగా కొత్త కమిటీలు ఏర్పాటుచేసుకుంటారు.
