నీటిని కాలుష్యం చేసినందుకు కర్ణాటక ప్రభుత్వానికి నేషనల్ గ్రీన్ ట్రిబ్యూనల్ రూ. 10 లక్షల జరిమానా విధించింది. కితిగనహళ్లి సరస్సులో చెత్తను పోయడంపై చర్యలు తీసుకోవాలని కోరుతూ సంజయ్ రావు సామాజిక కార్యకర్త దాఖలు చేసిన పిటిషన్‌ను గ్రీన్ ప్యానెల్ విచారించింది. బెంగళూరులోని బొమ్మసంద్ర శివారు సమీపంలో ఉన్న కితిగనహళ్లి సరస్సులోకి కాలుష్య కారకాలను విడుదల చేసినందుకు ప్రభుత్వానికి ఎన్‌జిటి ఈ ఫైన్ విధించింది. నీటి వనరుల్లోకి కాలుష్య కారకాలను విడుదల చేయడం నేరమని ట్రిబ్యూనల్ చెప్పింది.
రాష్ట్ర ప్రభుత్వంతో పాటు.. బొమ్మసంద్ర మునిసిపల్ కౌన్సిల్ విధులు నిర్వర్తించడంలో విఫలమైనందుకు రూ .5 లక్షల జరిమానా విధిస్తున్నట్లు ఎన్‌జిటి చైర్‌పర్సన్ జస్టిస్ ఆదర్శ్ కుమార్ గోయెల్ నేతృత్వంలోని ధర్మాసనం తెలిపింది. ట్రిబ్యునల్ మరియు సుప్రీంకోర్టు యొక్క ఆదేశాలను అధికారులు నిర్లక్ష్యం చేయడం మరియు ధిక్కరించడంతో పాటు పర్యావరణానికి, ప్రజారోగ్యానికి నష్టం కలిగించడం చాలా దురదృష్టకరం. దీని కోసం సత్వర పరిష్కార చర్యలు తీసుకోవాలి. అంతేకాకుండా తప్పు చేసిన అధికారుల నుంచి వివరణ కూడా కోరాలి’అని ధర్మాసనం తెలిపింది. శుద్ధి చేయని మురుగునీటిని నీటి వనరులలోకి పంపించడం వల్ల భారీ నష్టం జరుగుతుంది. అలాంటి వాటిని నివారించడం అధికారుల కర్తవ్యం అని ట్రిబ్యునల్ తెలిపింది.
‘పర్యావరణానికి జరిగిన నష్టానికి పైన పేర్కొన్న వాటిని దృష్టిలో ఉంచుకుని కర్ణాటక ప్రభుత్వం మరియు బొమ్మసాంద్ర మునిసిపల్ కౌన్సిల్ తాత్కాలిక ప్రాతిపదికన రూ .15 లక్షల జరిమాన విధిస్తున్నాం. రాష్ట్ర ప్రభుత్వానికి రూ .10 లక్షలు మరియు బొమ్మసాంద్ర మునిసిపల్ కౌన్సిల్ కు రూ .5 లక్షలు ఫైన్ గా విధిస్తున్నాం. రాష్ట్ర మరియు మునిసిపల్ కౌన్సిల్ యొక్క వాదనలు విన్న తర్వాత తుది పరిహారం నిర్ణయించబడుతుంది’ అని ధర్మాసనం తెలిపింది.
