- జంగాలపల్లి వద్ద డివైడర్ను ఢీకొట్టిన కారు..
- మరో నలుగురికి తీవ్ర గాయాలు
- లక్నవరం వెళ్లి వస్తుండగా ప్రమాదం
ములుగు/ఖాజీపేట, వెలుగు : ములుగు మండలం జంగాలపల్లి క్రాస్ రోడ్డు వద్ద గురువారం తెల్లవారుజామున జరిగిన రోడ్డు ప్రమాదంలో ఓ నిట్ స్టూడెంట్ చనిపోయింది. మరో నలుగురు విద్యార్థులు తీవ్రంగా గాయపడ్డారు. ఏపీలోని ఏలూరుకు చెందిన తాడేపల్లి నిస్సీ / సిజు (18), విజయవాడకు చెందిన శ్రేయ, హైదరాబాద్కు చెందిన ముర్తుజా, ఉమర్, సాయి, సుజిత్వరంగల్లోని నిట్లో బీటెక్ సెకండ్ఇయర్ (సివిల్) చదువుతున్నారు. బుధవారం వీరంతా కలిసి ఓ కారు అద్దెకు తీసుకుని ములుగు జిల్లా గోవిందరావుపేట మండలంలోని లక్నవరం సరస్సును చూసేందుకు వచ్చారు.
రాత్రి కాటేజీల్లో స్టే చేసి గురువారం క్లాసులు మిస్ కావద్దనే ఉద్దేశంతో తెల్లవారుజామున 4 గంటలకే వరంగల్కు బయలుదేరారు. ముర్తుజా కారు నడుపుతుండగా ములుగు మండలం జంగాలపల్లి వద్దకు రాగానే కారు డివైడర్ను ఢీకొట్టి పల్టీలు కొట్టి అక్కడే ఆగి ఉన్న లారీ కిందికి చొచ్చుకుపోయింది. తీవ్రంగా గాయపడిన నిస్సీ అక్కడికక్కడే చనిపోయింది.
శ్రేయ, ముర్తుజా, ఉమర్,సాయి తీవ్రంగా గాయపడ్డారు. సుజిత్కు స్వల్ప గాయాలయ్యాయి. గాయపడిన వారిని ములుగు ఏరియా దవాఖానకు తరలించి అక్కడి నుంచి వరంగల్లోని ఓ ప్రైవేట్ హాస్పిటల్కు షిఫ్ట్ చేశారు. సాయి పరిస్థితి విషమంగా ఉండడంతో హైదరాబాద్ లోని ప్రైవేట్ హాస్పిటల్కు తీసుకువెళ్లారు. నిద్రమత్తే ప్రమాదానికి కారణమని భావిస్తున్నారు. కేసు దర్యాప్తు చేస్తున్నట్టు ఎస్సై వెంకటేశ్వర్ తెలిపారు.
