ఐదుసార్లు సీఎం.. హ్యాట్రిక్ అధికారం.. అయినా 35 ఏండ్లుగా అసెంబ్లీకి పోటీ చేయలె
సీఎం అయినప్పటి నుంచి ఎమ్మెల్సీగానే నితీశ్ కుమార్
నితీశ్ కుమార్. బీహార్కు ఐదుసార్లు ముఖ్యమంత్రి. వరుసగా హ్యాట్రిక్ కొట్టి ఇప్పుడు నాలుగోసారి అధికార పీఠం దక్కించుకోవడానికి పావులు కదుపుతున్నారు. కానీ, నితీశ్ బీహార్ అసెంబ్లీ ఎన్నికల్లో నేరుగా పోటీ చేసి 35 ఏండ్లు అవుతోంది. 1985లో ఆయన తొలిసారి అసెంబ్లీకి ఎన్నికయ్యారు. ఆయన పోటీ చేయడం.. గెలవడం అదే చివరిసారి. అప్పటి నుంచి ఆయన లెజిస్లేటివ్ కౌన్సిల్ నుంచే ప్రాతినిథ్యం వహిస్తున్నారు.
నితీశ్కుమార్, యోగి ఆదిత్యనాథ్, ఉద్ధవ్ థాక్రే. మనదేశంలోని మూడు మోస్ట్ పాపులర్ స్టేట్స్.. బీహార్, ఉత్తరప్రదేశ్, మహారాష్ట్రకు వీరు ముఖ్యమంత్రులు. వీరి మధ్య ఒక కామన్ విషయం ఉంది. అదేంటంటే.. వారు తమతమ రాష్ట్రాల్లో లెజిస్లేటివ్ కౌన్సిల్కే ప్రాతినిథ్యం వహిస్తున్నారు. ముఖ్యమంత్రిగా ప్రమాణస్వీకారం చేసినా విధాన సభ ఎన్నికల్లో వీరెవరూ అసలు పోటీనే చేయలేదు. నితీశ్కుమార్ అయితే ఎప్పుడో 35 ఏండ్ల కిందచివరిసారిగా అసెంబ్లీ ఎన్నికల బరిలో నిలబడడ్డారు. ఆ తర్వాత ఎప్పుడూ కూడా విధానసభ ఎన్నికల్లో పోటీ చేయలేదు. యూపీ సీఎం యోగి ఆదిత్యనాథ్ మాత్రం.. గోరఖ్పూర్ పార్లమెంట్ నియోజకవర్గం నుంచి వరుసగా ఐదుసార్లు లోక్సభకు ప్రాతినిథ్యం వహించారు. 1998లో 26 ఏండ్ల వయసులో తొలిసారి యోగి ఎంపీగా గెలిచారు. ఇక మహారాష్ట్ర చీఫ్ మినిస్టర్ ఉద్ధవ్ థాక్రే అయితే అసలు జనరల్ ఎలక్షన్లలో పోటీనే చేయలేదు. ఉద్ధవ్, యోగి.. ఇద్దరూ కూడా తొలిసారిగా ముఖ్యమంత్రి పదవి చేపట్టారు.
పోటీ చేయకపోయినా.. పార్టీని గెలిపించిండు..
నితీశ్ విషయానికి వస్తే.. ఆయన అసెంబ్లీ ఎన్నికల్లో పోటీ చేయకపోయినా తన పార్టీని, కూటమిని.. వరుసగా మూడుసార్లు గెలిపించారు. త్వరలో జరగనున్న బీహార్ అసెంబ్లీ ఎన్నికల్లో నాలుగోసారి ఎలాగైనా విజయం సాధించేందుకు ప్రయత్నాలు చేస్తున్నారు. నితీశ్ ఇప్పటి వరకూ ఐదుసార్లు సీఎంగా ప్రమాణస్వీకారం చేశారు. 2000, 2005, 2010తో పాటు 2015లో రెండుసార్లు ప్రమాణం చేశారు. నితీశ్కుమార్ చివరిసారిగా 1985లో బీహార్ అసెంబ్లీకి పోటీ చేశారు. నితీశ్ 1977లో తొలిసారి అసెంబ్లీ ఎన్నికల బరిలో నిలుచున్నారు. హర్నౌత్ నుంచి పోటీ చేసిన ఆయన ఓటమి పాలయ్యారు. తిరిగి 1985లో పోటీ చేసి గెలిచారు. ఆయన అసెంబ్లీ ఎన్నికల్లో గెలవడం అదే తొలిసారి కాగా.. ఎలక్షన్లలో పోటీ చేయడం అదే చివరిసారి.
లోక్సభకు ఆరుసార్లు..
నితీశ్ అసెంబ్లీ ఎలక్షన్ల బరిలో దిగకపోయినా.. లోక్సభ ఎన్నికల్లో మాత్రం పోటీ చేశారు. ఆయన ఆరుసార్లు లోక్సభకు ఎన్నికయ్యారు. చివరిసారిగా 2004లో రెండు సీట్ల నుంచి లోక్సభకు పోటీ చేశారు. నలంద నియోజకవర్గం నుంచి గెలిచిన ఆయన బర్హ్ నియోజకవర్గంలో ఓటమిపాలయ్యారు. 2005లో బీహార్ సీఎం అయిన తర్వాత ఎంపీ సీటుకు నితీశ్ రాజీనామా చేశారు.
2005 నుంచి సీఎం సీటులోనే..
2014–15లో 9 నెలలు మినహా 2005 నుంచి ఇప్పటి వరకూ ఆయన బీహార్ సీఎంగా కొనసాగుతున్నారు. 2014 లోక్సభ ఎన్నికల్లో బీజేపీ విజయం సాధించిన తర్వాత ప్రధాని నరేంద్రమోడీతో రాజకీయ విబేధాల కారణంగా బీహార్ సీఎం పదవికి నితీశ్ రాజీనామా చేశారు. ఆ తర్వాత జీతన్రామ్ మాంఝీ ముఖ్యమంత్రి అయ్యారు. బీజేపీ నాయకత్వంతో విబేధాల కారణంగా 2015లో బీహార్ అసెంబ్లీ ఎన్నికలకు కొద్ది రోజుల ముందు మాంఝీ పదవి నుంచి దిగిపోగా.. మళ్లీ నితీశ్ సీఎం అయ్యారు. 2015 అసెంబ్లీ ఎన్నికల్లో లాలూ ప్రసాద్ యాదవ్ ఆర్జేడీతో కూటమి కట్టి పోటీ చేసిన నితీశ్ బంపర్ మెజార్టీ సాధించారు. కానీ 2017లో తిరిగి ఆయన ఎన్డీయే గూటికే చేరారు.
తొలిసారి ఎనిమిది రోజులే..
బీహార్ ముఖ్యమంత్రిగా తొలిసారి నితీశ్ కుమార్ ప్రమాణస్వీకారం చేసిన సమయానికి ఆయన బీహార్ అసెంబ్లీలోగానీ, కౌన్సిల్లో గానీ సభ్యునిగా లేరు. అయితే ఆయన టర్మ్ ఎనిమిది రోజుల్లోనే ముగియడంతో.. ఆయన అసెంబ్లీకిగానీ, కౌన్సిల్కుగానీ ఎన్నికవ్వాల్సిన అవసరం లేకపోయింది. 2005 నవంబర్లో రెండోసారి బీహార్ సీఎంగా ప్రమాణం చేశారు. ఆ సమయంలో ఆయన ఉభయ సభల్లో సభ్యునిగా లేరు. ఆ తర్వాత ఏడాది కౌన్సిల్కు ఎన్నికయ్యారు. చట్టం ప్రకారం.. ముఖ్యమంత్రి లేదా మంత్రులు రాష్ట్ర అసెంబ్లీ లేదా కౌన్సిల్లో సభ్యులై ఉండడం తప్పనిసరి. దేశంలో లెజిస్లేటివ్ కౌన్సిల్ ఉన్న ఆరు రాష్ట్రాల్లో బీహార్ ఒకటి. ఈ లిస్ట్లో తెలంగాణ, ఆంధ్రప్రదేశ్, ఉత్తరప్రదేశ్, మహారాష్ట్ర, కర్నాటక ఉన్నాయి.
బై చాయిస్ గానే ఎమ్మెల్సీ..
2012లో ఎమ్మెల్సీగా నితీశ్ పదవీకాలం ముగిసింది. తిరిగి ఎమ్మెల్సీగా ఆయన ఎన్నికయ్యారు. అయితే ఓటర్లను ఎదుర్కోవడానికి భయపడి నితీశ్ ఎన్నికల్లో పోటీ చేయడం లేదనే విమర్శలు వచ్చాయి. మళ్లీ ఎమ్మెల్సీగా ఎన్నికైన సందర్భంగా డైరెక్ట్ ఎలక్షన్ కంటే ఎమ్మెల్సీ రూట్ను ఎంచుకోవడంపై నితీశ్ క్లారిటీ ఇచ్చారు. 2012 జనవరిలో జరిగిన లెజిస్లేటివ్ కౌన్సిల్ సెంటినరీ సెలబ్రేషన్స్ మీటింగ్లో నితీశ్ మాట్లాడుతూ.. ‘‘నేను బై చాయిస్గానే ఎమ్మెల్సీ మార్గాన్ని ఎంచుకున్నా. అంతే తప్ప ఎటువంటి బలమైన కారణం లేదు. అప్పర్హౌస్ అనేది గౌరవనీయమైన సంస్థ. నా ఆరేండ్ల పదవీకాలం పూర్తయిన తర్వాత మళ్లీ లెజిస్లేటివ్ కౌన్సిల్కే ఎన్నికవుతా”అని చెప్పారు. ఇక 2015 అసెంబ్లీ ఎన్నికలకు ముందు ప్రచారం సమయంలో తన ఫోకస్ అంతా ఒక్క సీటుపైనే పెట్టాలని తాను భావించడం లేదని, అందుకే తాను అసెంబ్లీ ఎన్నికల్లో పోటీ చేయడం లేదని వివరణ ఇచ్చారు. 2018లో వరుసగా మూడోసారి నితీశ్ కౌన్సిల్కు ఎన్నికయ్యారు. ఆయన టర్మ్ 2024 వరకూ ఉంది. ఆయన పదవీకాలం పూర్తయ్యేటప్పటికి నితీశ్ వయసు 74కు చేరుతుంది. అప్పటికి ఆయన యాక్టివ్ పాలిటిక్స్కు దూరమయ్యే అవకాశం ఉందని పొలిటికల్ ఎక్స్పర్ట్స్ అంచనా వేస్తున్నారు.
For More News..
