- కొత్త వివాదంలో చిక్కుకున్న నిజామాబాద్ ఎమ్మెల్సీ
- ఆధారాలతో ఎన్నికల సంఘానికి ఫిర్యాదు చేసిన కాంగ్రెస్
- రెండు చోట్ల ఓటు ఎట్లా వేస్తారన్న ఇందిరా శోభన్
హైదరాబాద్, వెలుగు: నిజామాబాద్ జిల్లా నవీపేట్మండలం పోతంగల్లో ఓటు హక్కు ఉన్నా కూడా.. జీహెచ్ఎంసీ ఎన్నికల్లోనూ ఎమ్మెల్సీ కవిత ఓటు వేశారు. అక్కడి ఓటర్ లిస్ట్లో పోలింగ్బూత్నెం.183, సీరియల్ నెంబర్361పై ఇప్పటికీ ఆమె పేరుతో ఓటు ఉంది. 2014, 2019 జనరల్ ఎలక్షన్స్తో పాటు సర్పంచ్, ఎంపీటీసీ, జెడ్పీటీసీ ఎన్నికల్లో తన భర్త, అనిల్ కుమార్, అత్తామామలతో కలిసి ఆమె ఓటు వేశారు. ఇప్పుడు గ్రేటర్ ఎన్నికల్లోనూ ఆమె ఓటు వేసి వివాదంలో చిక్కుకున్నారు. కవిత రెండు చోట్ల ఓటు వేయడంపై కాంగ్రెస్ మండిపడింది. ఆధారాలతో సహా మంగళవారం రాష్ట్ర ఎన్నికల సంఘానికి పీసీసీ అధికార ప్రతినిధి ఇందిరా శోభన్ ఫిర్యాదు చేశారు. ఎలక్షన్ కమిషన్ వెబ్సైట్ ప్రకారం బోధన్ నియోజకవర్గంలోని పోతంగల్ అప్పర్ ప్రైమరీ స్కూల్లో కవిత ఓటరుగా ఎన్రోల్ చేసుకున్నారని, ఇప్పటికీ అక్కడే ఆమెకు ఓటు హక్కు ఉందని, అయినా కూడా బంజారాహిల్స్లో కవిత ఓటెలా వేశారని ఆమె ప్రశ్నించారు. ప్రజాప్రతినిధి అయి ఉండి కూడా ఓటును దుర్వినియోగం చేశారని మండిపడ్డారు. పోలింగ్ సెంటర్లోకి మామూలుగా ఫోన్లను తీసుకెళ్లనివ్వరని, కానీ, కవిత మాత్రం ఓటును బ్యాలెట్ బాక్సులో వేసిన ఫొటోలు బయటపెట్టారని విమర్శించారు. ఇది ఎన్నికల రూల్స్ను ఉల్లంఘించడమేనని ఆగ్రహం వ్యక్తం చేశారు. రాజ్యాంగాన్ని చిన్నచూపు చూస్తూ ఓటును దుర్వినియోగం చేసిన కవితకు ఎమ్మెల్సీగా కొన‌‌సాగే నైతిక హక్కు లేద‌‌న్నారు. కవిత ఓటు వేయడంపై తమకు ఎలాంటి అభ్యంతరం లేదని, కానీ, పోతంగల్లో ఓటు ఉన్నా హైదరాబాద్లో రెండో ఓటు ఎలా వేశారని ప్రశ్నించారు. సాక్షాత్తూ సీఎం కేసీఆర్ కూతురే ఇట్ల రెండు చోట్ల ఓటు వేయడమేంటని ఆగ్రహం వ్యక్తం చేశారు.
