బోధన్,వెలుగు: కాంగ్రెస్ ప్రవేశపెట్టిన మేనిఫెస్టో హిందుసమాజం భయపడే విధంగా ఉందని నిజామాబాద్ ఎంపీ ధర్మపురి అర్వింద్ అన్నారు. మంగళవారం బోధన్ పట్టణంలోని రాకాసిపేట్లో బీజేపీ ఆఫీస్ను ప్రారంభించారు. ఈ సందర్భంగా ఆయన మీడియాతో మాట్లాడారు. కాంగ్రెస్ దేశంలోని సంపదను దోచిపెట్టి, ముస్లింలకు పంచడానికి సిద్ధమైందన్నారు. 65 ఏండ్లలో జరగని అభివృద్ది బీజేపీ పదేండ్ల లో చేసి చూపించిందన్నారు. కాంగ్రెస్ నాయకులకు బీజేపీ చేసిన అభివృద్ధి కనిపించడంలేదా అని ప్రశ్నించారు.
మోదీ ప్రభుత్వం ప్రవేశపెట్టిన సంక్షేమ పథకాలు అన్ని వర్గాలకు అందాయని చెప్పారు. కాంగ్రెస్ పార్టీ హిందువులపై ఎందుకు కక్ష్య పెంచుకుందో తెలియడంలేదన్నారు. ఆ పార్టీ ఆరు గ్యారంటీల పేరుతో రాష్ట్రంలో అధికారంలోకి వచ్చి, ఇప్పుడు మరిచిపోయిందన్నారు. అలాగే బీఆర్ఎస్ కాళేశ్వరం ప్రాజెక్టులో లక్షల కోట్లు అవినీతి చేసినా రాష్ట్ర ప్రభుత్వం ఎందుకు చర్యలు తీసుకోవడం లేదని ప్రశ్నించారు.
ఆనంతరం వీరహనుమాన్ జయంతి ఉత్సవాల్లో ఆయన పాల్గొన్నారు. కార్యక్రమంలో బీజేపీ జిల్లా అధ్యక్షుడు దినేశ్ కులకర్ణి, బీజేపీ రాష్ట్ర కార్యవర్గసభ్యులు మేడపాటి ప్రకాష్ రెడ్డి, మోహన్ రెడ్డి,బీజేపీ పట్టణ అధ్యక్షుడు కొలిపాక బాల్ రాజ్, నాయకులు సుధకార్చారి, మేక సంతోష్ పాల్గొన్నారు.
