- సభ్యుల నిరసన మధ్య 39 ఎజెండా అంశాల ఆమోదం
- ఫుట్పాత్ వ్యాపారుల తొలగింపుపై మజ్లిస్ నిరసన
- ట్రాఫిక్ సమస్య రీత్యా
- అది కరెక్టేనని బీజేపీ కౌంటర్
- డెవలప్మెంట్పై చర్చ ఎక్కడని కాంగ్రెస్ సభ్యులు గరం
నిజామాబాద్, వెలుగు: నిజామాబాద్ మున్సిపల్ కార్పొరేషన్ పాలకవర్గం ఆఖరి మీటింగ్ రసాభాసా మధ్య ముగిసింది. మరో వారంలో పదవీ కాలం పూర్తి చేసుకోనున్న కార్పొరేటర్లు ఎజెండాలో చేర్చని అంశాలపై చర్చించాలని పట్టుబట్టారు. ఈ సందర్భంగా బీజేపీ, కాంగ్రెస్, మజ్లిస్ సభ్యులు ఎవరికి వారు మేయర్ నీతూకిరణ్ ఛాంబర్ ఎదుట బైఠాయించారు.
ఎజెండా చదువుతుండగా మజ్లిస్ అడ్డగింత
ఉదయం 11 గంటలకు ప్రారంభం కావాల్సిన మీటింగ్ మధ్యాహ్నం ఒంటి గంటకు స్టార్ట్ అయింది. పాలకవర్గానికి ఇది చివరి మీటింగ్ కావడంతో గత ఐదేండ్లలో చేసిన డెవలప్మెంట్ను ఆమె క్లుప్తంగా వివరించారు. అసెంబ్లీని తలపించేలా కొత్త మున్సిపల్ ఆఫీస్ నిర్మించామని, అండర్ గ్రౌండ్ డ్రైనేజీ నిర్మాణం, అన్ని కాలనీలకు మెరుగైన నీటి సరఫరా, పాదచారుల కోసం మొబైల్ టాయిలెట్ వ్యవస్థ, 277 వెహికల్స్తో ఇంటింటి చెత్త సేకరణ, ఇంటెగ్రేటెడ్ వెజిటేబుల్ మార్కెట్ తదితర వాటిని నిర్మించే చాన్స్ తమకు దక్కిందని చెప్పి అజెండా అంశాలను చదవడానికి సిబ్బందిని అనుమతించారు. అభివృద్ధి పనులు, ఔట్ సోర్సింగ్ ఉద్యోగుల విధుల పొడిగింపు వంటి అంశాలు ఉన్నాయి.
ఎజెండాలోని ఎనిమిదో అంశం చదువుతున్న టైంలో మజ్లిస్ పార్టీకి చెందిన డిప్యూటీ మేయర్ మహ్మద్ ఇద్రిస్ ఖాన్ నగరంలో ఫుట్ పాత్ వ్యాపారులను తొలగించడంతో ఉపాధి కోల్పోయి ఆందోళన చెందుతున్నారని అభిప్రాయం వ్యక్తం చేశారు. అర్బన్ ఎమ్మెల్యే ధన్పాల్ సూర్యనారాయణ ఇంటికి వెళ్లే రోడ్ క్లియర్ చేయడానికి వ్యాపారుల పొట్టకొట్టారని ఆరోపించారు.
వారంతా తిరిగి వ్యాపారాలు చేసుకునేలా తీర్మానం చేయాలని డిమాండ్ చేశారు. దీనికి మేయర్ నీతూకిరణ్ అంగీకరించకపోవడంతో మీటింగ్ హాల్ నుంచి వచ్చి బయకూర్చుని నిరసన తెలిపారు. సిటీలో ట్రాఫిక్, పారిశుధ్య సమస్య తీర్చడానికి ఫుట్ పాత్ బిజినెస్కు పర్మిషన్ ఇవ్వొద్దని బీజేపీ ఫ్లోర్ లీడర్ స్రవంతిరెడ్డి నాయకత్వంలో కార్పొరేటర్లు మల్లేశ్ యాదవ్, న్యాలం రాజు తదితరులు కోరారు.
Also Read :- మడికొండ డంప్ యార్డ్ పై గ్రేటర్ వరంగల్‌ వాసుల ఆందోళన
నిజానికి మజ్లిస్ నేతల సొంత బిజినెస్ క్లోజ్కావడంతో చిరు వ్యాపారుల పేరుతో రాజకీయాలు చేస్తున్నారని మండిపడ్డారు. హాల్ బయట మజ్లిస్ కార్పొరేటర్ల నినాదాలు చేశారు. అనంతరం మొత్తం 39 అంశాలు ఆమోదం పొందాయని మేయర్ నీతూకిరణ్ ప్రకటించారు. డెవలప్మెంట్ పనులపై చర్చలేకుండా మేయర్ వెళ్లిపోవడేమిటని ఆగ్రహం చెందిన బీజేపీ కార్పొరేటర్లు హాల్ లో బైఠాయించి నిరసన వ్యక్తం చేశారు.
కాంగ్రెస్ కార్పొరేటర్ గడుగు రోహిత్ నేతృత్వంలో ఆయన మద్ధతుదారులు మేయర్ నీతూ కిరణ్ ఛాంబర్ వద్దకు వెళ్లి అభివృద్ధిపై చర్చ లేకుండా మీటింగ్ అర్థాంతరంగా ఎట్ల ముగిస్తారని ఆందోళనకు దిగారు. ఇలా మజ్లిస్, బీజేపీ, కాంగ్రెస్ మూడు పార్టీలు ఎవరికి వారు తమ నిరసన వ్యక్తం చేశారు. . మీటింగ్ ముగిసే దాకా ఉండి అర్బన్ ఎమ్మెల్యే ధన్పాల్ సూర్యనారాయణ వెళ్లిపోయారు.
మీడియా బాయ్కాట్
మీటింగ్ కవరేజ్కు వెళ్లిన మీడియాపై ఆంక్షలు పెట్టడాన్ని జర్నలిస్టులు నిరసించారు. గత ఐదేండ్లు మీటింగ్ హాల్ ఎదుట ఉన్న వెయిటింగ్ హాల్దాకా అనుమతించిన మేయర్ నీతూకిరణ్ శనివారం అక్కడిదాకా కూడా రానీయకపోవడం ఏంటని ప్రశ్నించారు. సమావేశపు అంశాలు ఆమె మీడియా ఎదుటకు రాగా బాయ్కాట్ చేస్తున్నామని ప్రకటించి జర్నలిస్టులు వెళ్లిపోయారు.
