బీఆర్ఎస్ పార్టీకి చెందిన వైరా మున్సిపల్ చైర్మన్ సూతకాని జైపాల్ పై కలెక్టర్ వీపీ గౌతమ్కు ఆ పార్టీ కౌన్సిలర్లు అవిశ్వాస తీర్మానం అందజేశారు. సోమవారం సాయంత్రం జిల్లా ఇంటిగ్రేటెడ్ ఆఫీసర్స్కాంప్లెక్స్ లో కలెక్టర్వీపీ గౌతమ్ను 16 మంది కౌన్సిలర్లు కలిశారు. వీరిలో 14 మంది బీఆర్ఎస్ కౌన్సిలర్లు, ఇద్దరు కాంగ్రెస్ కౌన్సిలర్లు ఉన్నారు. మున్సిపల్ చైర్మన్ సూతకాని జైపాల్ ప్రస్తుతం మాజీ ఎంపీ పొంగులేటి శ్రీనివాస్ రెడ్డి వర్గంలో ఉన్నారు. మున్సిపాలిటీలో 20 మంది కౌన్సిలర్లుండగా, జైపాల్ వెంట నలుగురు కౌన్సిలర్లు మాత్రమే ఉన్నారు.
వైరాలో పొంగులేటి వర్గానికి చెక్ పెట్టేందుకు జిల్లా పార్టీ అధ్యక్షుడు, ఎమ్మెల్సీ తాతా మధుసూదన్ఆధ్వర్యంలో ఈ అవిశ్వాసానికి స్కెచ్వేశారు. సోమవారం ఉదయం 11 గంటల నుంచి వైరా ఎమ్మెల్యే క్యాంప్ఆఫీస్లో రాములునాయక్ తో కలిసి కౌన్సిలర్లతో భేటీ అయ్యారు. ఇటీవల ఖమ్మంలో జరిగిన బీఆర్ఎస్ బహిరంగ సభలో వైరా మున్సిపాలిటీకి రూ.30 కోట్లను సీఎం కేసీఆర్ ప్రకటించారని, వాటితో మున్సిపాలిటీని అభివృద్ధి చేసేందుకు అవకాశం ఉంటుందని కౌన్సిలర్లతో చెప్పారు. పార్టీకి వ్యతిరేకంగా వ్యవహరించిన వారిపై చర్యలు తీసుకుందామన్నారు.
ఈ మీటింగ్ లోనే కొత్త చైర్మన్ అభ్యర్థిపై కూడా చర్చించినట్టు తెలుస్తోంది. చైర్మన్ పదవిని ఆశిస్తున్న నాయకుడితో కూడా మాట్లాడించినట్టు సమాచారం. ఆ తర్వాత ఇద్దరు కాంగ్రెస్కౌన్సిలర్లు, 14 మంది బీఆర్ఎస్ కౌన్సిలర్లను వెంట బెట్టుకొని కలెక్టరేట్ కు తీసుకెళ్లారు. అక్కడ కలెక్టర్ కు అవిశ్వాస తీర్మాన కాపీని అందజేశారు.
