యాదాద్రి, వెలుగు: భువనగిరి ఎమ్మెల్యే పైళ్ల శేఖర్రెడ్డికి సొంత పార్టీ కౌన్సిలర్లు జలక్ ఇచ్చారు. బీజేపీ, కాంగ్రెస్ కౌన్సిలర్లతో కలిసి ఇద్దరు బీఆర్ఎస్కౌన్సిలర్లు భువనగిరి మున్సిపల్చైర్మన్ ఎనబోయిన ఆంజనేయులు, వైస్ చైర్మన్ చింతల కిష్టయ్యపై అవిశ్వాసం ప్రకటించారు. యాదాద్రి కలెక్టర్ పమేలా సత్పతికి అవిశ్వాసం నోటీసు అందించారు. భువనగిరి మున్సిపాలిటీలో 35 వార్డులు ఉండగా బీఆర్ఎస్ 15 సీట్లు, కాంగ్రెస్11, బీజేపీ 7, ఇద్దరు ఇండిపెండెంట్లు ఉన్నారు. గతంలో చైర్మన్ పదవిని ఆశించిన పలువురు తీవ్ర నిరాశకు గురయ్యారు. ఆ తర్వాత కాంగ్రెస్ కు చెందిన జిట్టా వేణుగోపాల్రెడ్డి బీఆర్ఎస్లో చేరడంతో ఆ పార్టీకి బలం 18కి చేరింది. ఇప్పుడు రాష్ర్టంలో ఎక్కడ చూసినా మూడేండ్ల తర్వాత మున్సిపాలిటీల్లో అవిశ్వాసం ప్రకటిస్తున్నారు. దీంతో భువనగిరి కౌన్సిలర్లు కూడా అదే దారిలో ఉన్నారు.
గమనించిన ఎమ్మెల్యే వారిని సముదాయిస్తున్నారు. అయితే బీజేపీ, కాంగ్రెస్ అవిశ్వాసం ప్రకటించేందుకు సన్నద్ధం కావడంతో బీఆర్ఎస్కు చెందిన అజీమ్, కుశంగుల ఎల్లమ్మ వారితో జత కట్టారు. ఎమ్మెల్యే ఏరికోరి చేసిన చైర్మన్, వైస్చైర్మన్కు వ్యతిరేఖంగా సొంత పార్టీ కౌన్సిలర్లు అవిశ్వాసానికి ముందుకు రావడం, మరికొందరు బీఆర్ఎస్ కౌన్సిలర్లు కూడా చైర్మన్ పై వ్యతిరేకతతో ఉన్నట్టు తెలుస్తోంది.
