తుది అంకానికి భువనగిరి అవిశ్వాసం

23న భువనగిరి మున్సిపల్సమావేశం
చైర్మన్, వైస్చైర్మన్కు పదవీ గండం

యాదాద్రి, వెలుగు : యాదాద్రి జిల్లా భువనగిరి మున్సిపాలిటీలో కొద్దిరోజులుగా కొనసాగుతున్న అవిశ్వాస రాజకీయం ఎట్టకేలకు కొలిక్కివచ్చింది. మున్సిపల్ చైర్మన్ ఎనబోయిన ఆంజనేయులు, వైస్ చైర్మన్ చింతల కిష్టయ్యపై సభ్యులు ఇచ్చిన అవిశ్వాస తీర్మానం మేరకు బల నిరూపణకు తేదీ ఖరారైంది. తెలంగాణ మున్సిపల్ యాక్ట్ 2019 ప్రకారం ఈ నెల 23న అవిశ్వాసంపై సమావేశం నిర్వహిస్తామని యాదాద్రి కలెక్టర్ హనుమంతు జెండగే శుక్రవారం స్పష్టం చేశారు. దీంతో చైర్మన్, వైస్చైర్మన్లకు పదవీ గండం పొంచి ఉంది.

ఇండిపెండెంట్ల సాయంతో బీఆర్ఎస్ పాగా..

భువనగిరి మున్సిపాలిటీలో 35 వార్డులున్నాయి. 2020లో జరిగిన మున్సిపల్ ఎన్నికల్లో బీఆర్ఎస్15 సీట్లు గెలిచింది. కాంగ్రెస్ 11, బీజేపీ 7 సీట్లు సాధించగా, ఇద్దరు ఇండిపెండెంట్లు గెలిచారు. 15 మంది బలమే ఉండడంతో బీఆర్ఎస్ ఇద్దరు ఇండిపెండెంట్లను చేర్చుకుంది. ఎక్స్అఫీషియో మెంబర్లుగా ఉన్న ఎమ్మెల్యే, ఎమ్మెల్సీ ఓట్లతో చైర్మన్, వైస్ చైర్మన్ పదవులను బీఆర్ఎస్ దక్కించుకుంది.

అనంతరం జరిగిన పరిణామాల్లో కాంగ్రెస్కు చెందిన ఇద్దరు, బీజేపీకి చెందిన ఒకరు బీఆర్ఎస్లో చేరడంతో ఆ పార్టీ బలం 20కి చేరింది. చైర్మన్, వైస్ చైర్మన్లుగా రాయగిరికి చెందిన ఎనబోయిన ఆంజనేయులు, చింతల కిష్టయ్యకు అప్పగించడంతో భువనగిరి టౌన్కు చెందిన కౌన్సిలర్లు అసంతృప్తికి లోనయ్యారు. మూడేండ్ల పాటు ఓపిక పట్టి గతేడాది జనవరి లో చైర్మన్, వైస్చైర్మన్లపై అవిశ్వాస తీర్మానాన్ని ప్రతిపాదిస్తూ అప్పటి కలెక్టర్ పమేలా సత్పతికి నోటీసులు అందించారు. కానీ రంగంలోకి దిగిన అప్పటి ఎమ్మెల్యేలు అసంతృప్తులతో మాట్లాడి సర్దిచెప్పారు.

తాజాగా తెరపైకి అవిశ్వాసాలు..

అసెంబ్లీ ఎన్నికల్లో బీఆర్ఎస్ ఓడిపోయి కాంగ్రెస్ అధికారంలోకి రావడంతో మరోసారి అవిశ్వాస అంశం తెరపైకి వచ్చింది. భువనగిరి చెందిన బీఆర్ఎస్ అసంతృప్త కౌన్సిలర్లు 16 మంది, కాంగ్రెస్కు చెందిన తొమ్మిది మందిని, బీజేపీకి చెందిన ఆరుగురిని కలుపుకొని మొత్తంగా 31 మంది గత నెల 27న మరోసారి అడిషనల్ కలెక్టర్ వీరారెడ్డికి అవిశ్వాస తీర్మానాన్ని అందించారు. దీంతో అన్నీ పరిశీలించిన ఆయన, ఈ నెల 23న ఉదయం 11 గంటలకు అవిశ్వాస మీటింగ్ ఏర్పాటు చేశారు. అసంతృప్త కౌన్సిలర్లు ఎక్కువగా ఉండడంతో చైర్మన్, వైస్చైర్మన్లిద్దరూ పదవులు కోల్పోయే అవకాశం కనిపిస్తోంది.

పెండింగ్లోనే ఆలేరు..?

ఆలేరు మున్సిపల్చైర్మన్ వస్పరి శంకరయ్యపై బీఆర్ఎస్, బీజేపీ, కాంగ్రెస్కౌన్సిలర్లు గతేడాది జనవరిలో అవిశ్వాసం నోటీసు ఇచ్చిన సంగతి తెలిసిందే. ఈకక్రమంలో వారంతా కలెక్టర్ హనుమంతు జెండగే, అడిషనల్ కలెక్టర్ వీరారెడ్డిని కలిశారు. సమావేశంపై ఇప్పటికి ఎలాంటి నిర్ణయం తీసుకోలేదు. కాగా చౌటుప్పల్, యాదగిరిగుట్ట చైర్మన్లు కాంగ్రెస్లో చేరడంతో అవిశ్వాస గండం నుంచి తప్పించుకున్నట్లయింది.