భద్రాద్రికొత్తగూడెం, వెలుగు : పాఠశాలలకు ఇవ్వాల్సిన ఫండ్స్ను ప్రభుత్వం ఇన్టైంలో రిలీజ్ చేయకపోవడంతో టీచర్లు తిప్పలు పడుతున్నారు. స్వాతంత్ర్య వజ్రోత్సవాలను ఘనంగా జరుపుకోవాలని ప్రధాని మోడీతో పాటు సీఎం కేసీఆర్ పిలుపునిచ్చారు. రెండు వారాల పాటు వజ్రోత్సవాలు నిర్వహించాలని సీఎం ఆదేశించారు. కానీ బడులకు ఫండ్స్ రిలీజ్ చేయకపోవడంతో పంద్రాగస్టు వేడుకలు ఎట్లా చేయాలని హెచ్ఎంలు, టీచర్లు వాపోతున్నారు.
పైసల కోసం తిప్పలు..
ఏటా విద్యార్థుల సంఖ్యను బట్టి హైస్కూల్స్కు ప్రభుత్వం నిధులను విడుదల చేస్తుంది. ఇలా ఒక్కో బడికి రూ. 20 వేల నుంచి రూ.75 వేల వరకు ఫండ్స్ వస్తాయి. ప్రైమరీ స్కూల్స్కు
రూ.15వేలు, అప్పర్ ప్రైమరీ స్కూల్స్కు రూ. 20 వేలు ఇస్తుంది. జిల్లాలో 792 ప్రైమరీ స్కూల్స్, 162 యూపీఎస్, 111 హైస్కూల్స్ ఉన్నాయి. వీటికి రూ.2 కోట్ల మేర నిధులు రావాల్సి ఉంది. అలాగే ఎమ్మార్సీలకు ప్రభుత్వం ఏటా రూ. 90 వేలు ఇస్తుంది. ఈ నిధులను ఏడాదికి రెండు దఫాలుగా విడుదల చేస్తుంది. ఈ నిధులను స్టేషనరీ ఇతరత్రా అవసరాలకు ఉపయోగిస్తారు. స్కూల్స్ స్టార్ట్ అయి రెండు నెలలు కావొస్తున్నా ఒక్క పైసా ఇవ్వకపోవడంతో టీచర్లు తమ జేబుల్లోంచే డబ్బులు పెట్టాల్సి వస్తుందని వాపోతున్నారు.
రెగ్యులర్ ఎంఈవోలు కరువు..
జిల్లాలోని 23 మండలాలకు ఒక్కరు కూడా రెగ్యులర్ ఎంఈవో లేరు. ఒక్కో హెచ్ఎం రెండు నుంచి మూడు మండలాలకు ఇన్చార్జి ఎంఈవోలుగా వ్యవహరిస్తున్నారు. జిల్లాలో 662 టీచర్ పోస్టులు ఖాళీగా ఉండడంతో విద్యాబోధన అంతంతమాత్రంగానే జరుగుతోంది. 44 గ్రేడ్–2 హెచ్ఎం, 343 స్కూల్ అసిస్టెంట్, 241 ఎస్జీటీ పోస్టులతో పాటు లాంగ్వేజ్ పండిట్, పీఈటీలు, మ్యూజిక్, క్రాఫ్ట్, ఆర్ట్ టీచర్ల పోస్టులు ఖాళీగా ఉన్నాయి. టీచర్ల నియామకం జరిగేంత వరకు విద్యావలంటీర్లనైనా తీసుకోవాలని ఉపాధ్యాయ సంఘాల నాయకులు కోరుతున్నారు.
ప్రోగ్రామ్స్ ఎట్ల చేయాలె..
పాఠశాలలకు నిధులను వెంటనే రిలీజ్ చేయాలి. బడులు ప్రారంభమై రెండు నెలలు గడుస్తున్నా టీచర్ల కొరత వెంటాడుతోంది. ప్రోగ్రామ్స్ చేయాలని చెబుతున్న ప్రభుత్వం ఫండ్స్ ఇవ్వక పోవడం సరైంది కాదు. స్వాతంత్ర్య దినోత్సవం, వజ్రోత్సవ వేడుకలకు నిధులు వెంటనే ఇవ్వాలి.
- డి. వెంకటేశ్వరరావు, పీఆర్టీయూ జిల్లా అధ్యక్షుడు
