- పోలీసులకు తెలిపిన కుటుంబసభ్యులు
- ఉస్మానియా హాస్పిటల్లో పోస్టుమార్టం పూర్తి
- డెడ్ బాడీ కర్నాటకకు తరలింపు, అక్కడే అంత్యక్రియలు
గచ్చిబౌలి, వెలుగు: కన్నడ సీరియల్ నటి శోభిత శివన్న ఆత్మహత్యపై గచ్చిబౌలి పోలీసులు దర్యాప్తు ముమ్మరం చేశారు. కర్నాటక నుంచి వచ్చిన శోభిత తల్లి, అక్కాచెల్లెళ్లు సోమవారం గచ్చిబౌలి పీఎస్లో విచారణకు హాజరయ్యారు. ఆమె ఆత్మహత్యపై ఎలాంటి అనుమానాలు లేవన్నారు.
ఉస్మానియా హాస్పిటల్లో పోస్టుమార్టం పూర్తి కాగా, రిపోర్టులో సైతం శోభితది ఆత్మహత్యే అని తేలిందని ఎస్ఐ వెంకటేశ్వర్లు తెలిపారు. ఆమె శరీరంపై ఎలాంటి గాయాలు లేవని పేర్కొన్నారు. కన్నడలో ప్రముఖ సీరియల్ నటిగా గుర్తింపు తెచ్చుకున్న శోభిత హైదరాబాద్తుక్కుగూడకు చెందిన సుధీర్రెడ్డితో వివాహం చేసుకొని, ఇక్కడే ఉంటోంది.
పెళ్లి తర్వాత సీరియల్స్, సినిమాలు మానేసింది. ఈ మధ్యే తెలుగు సీరియల్స్లో అవకాశాల కోసం వెతుకుతుందని కుటుంబసభ్యులు, సన్నిహితులు తెలిపారు. ఈ క్రమంలో ఇంట్లో ఒంటరిగా ఉండడంతో డిప్రెషన్లోకి వెళ్లి, ఆత్మహత్య చేసుకొని ఉండొచ్చన్నారు.
‘యు కెన్ డూ ఇట్’ అంటూ సూసైడ్ నోట్
అయితే, శోభిత ఆత్మహత్య చేసుకున్న సంఘటనా స్థలంలో సూసైడ్నోట్ను పోలీసులు గుర్తించారు. అందులో ‘‘సూసైడ్ చేసుకోవాలంటే యు కెన్ డూ ఇట్’’ అంటూ రాసి ఉంది. ఈ నోట్ను శోభిత ఎవరిని ఉద్దేశించి రాసిందనే కోణంలో పోలీసులు దర్యాప్తు చేస్తున్నారు.
ఇప్పటికే శోభిత భర్తతో పాటు ఇంటి చుట్టుపక్కల ఉన్నవారి స్టేట్మెంట్లను రికార్డు చేసుకున్నారు. చనిపోయే ముందు శోభిత తన సోదరికి కాల్చేసి తాను హ్యాపీగా ఉన్నట్లు తెలిపింది. భార్యభర్తల మధ్య ఎలాంటి విబేధాలు లేవని పోలీసులు తెలిపారు. పోస్టుమార్టం అనంతరం డెడ్బాడీని కుటుంబసభ్యులకు అప్పగించగా, అంత్యక్రియల కోసం కర్నాటకలోని వారి స్వగ్రామానికి తీసుకెళ్లారు.
