ఖమ్మం, వెలుగు : పాలేరు మాజీ ఎమ్మెల్యే ఉపేందర్ రెడ్డిపై హైదరాబాద్లో భూ కబ్జా కేసు నమోదైంది. షేక్ పేట్ తహసీల్దార్ అనితారెడ్డి ఫిర్యాదుతో ఆదివారం బంజారా హిల్స్ పోలీసులు కేసు నమోదు చేశారు. బంజారాహిల్స్ రోడ్ నెంబర్ 3 లో ఉన్న 2185 గజాల ప్రభుత్వ భూమిని దీప్తి అవెన్యూ ప్రైవేట్ లిమిటెడ్ సంస్థకు చెందిన కందాల ఉపేందర్ రెడ్డితో పాటు మరికొందరు కలిసి కబ్జా చేసి వైన్ షాప్ కోసం నిర్మాణాలు చేపట్టారు.
విషయం తెలుసుకున్న షేక్పేట తహసీల్దార్ అనితారెడ్డి..బంజారాహిల్స్ పోలీసులకు ఫిర్యాదు చేశారు. తహసీల్దార్ ఇచ్చిన ఫిర్యాదుతో ఉపేందర్ రెడ్డితో పాటు మరికొందరిపై ఐపీసీ సెక్షన్లు 447, 427,467, 468, 471, సెక్షన్ 3 పీడీపీపీ (ప్రివెన్షన్ఆఫ్డ్యామేజ్ టు పబ్లిక్ ప్రాపర్టీ) చట్టం కింద కేసు నమోదు చేసి బంజారాహిల్స్ పోలీసులు దర్యాప్తు చేస్తున్నారు.
